Подпишитесь на нашу ежедневную рассылку с новыми материалами

Общество


Актывісты Маладога Фронту арганізавалі сёньня каля будынкаў раённых пракуратураў Менску акцыю "Абярэм прэзыдэнта, пры якім не зьнікаюць людзі". Моладзевая акцыя была прымеркаваная да Дня работнікаў пракуратуры, які сёньня адзначаецца ў Беларусі.

Сёньня раніцай каля 10 маладафронтаўцаў у аранжавых футболках з надпісам "Выбірай" і датай правядзеньня прэзыдэнцкіх выбараў, 9 верасьня, прыйшлі да будынку пракуратуры Савецкага раёну Менску.

Яны трымалі асобнікі спэцыяльнага выпуску газэты "Рабочы" з інфармацыяй пра 22 прэтэндэнтаў на прэзыдэнта, а таксама з фрагмэнтамі вядомага інтэрвію былых сьледчых пракуратуры Случака й Петрушкевіча.

Акрамя газэты, маладыя апазыцыянэры прапаноўвалі мінакам паставіць аўтограф у падпісным лісьце, дзе было пазначана "Ініцыятыўная група №23 — подпісы выбарцаў у падтрымку асобы, прапанавай для вылучэньня кандыдатам у прэзыдэнты Рэспублікі Беларусі. Кандыдат, пры якім не зьнікаюць людзі".

Гаворыць арганізатар сёньняшняй акцыі, лідэр Маладога Фронту Павал Севярынец:

(Севярынец: ) "У такі дзень — 26-га, Дзень работнікаў пракуратуры, асабліва важна, што думаюць работнікі пракуратуры. Але супрацоўнікі пракуратуры Случак і Петрушкевіч зьехалі зь Беларусі, таму што іхнаму жыцьцю пагражала рэальная небясьпека. З-за той інфармацыі, якую яны ведаюць, з-за таго, што ў Беларусі зьнікаюць людзі, і зараз ніводны супрацоўнік пракуратуры ня можа пачувацца ўпэўнена й спакойна.

Таму мы зьбіраем подпісы сярод іх і дзеля таго, каб нагадаць ім пра гэта, і дзеля таго, каб выпрабаваць гэтых людзей. Яны павінны стаяць на абароне закону. Адначасова мы будзем агітаваць маладых людзей і работнікаў пракуратуры ўзяць удзел у гэтых выбарах".

Мінакі даволі актыўна цікавіліся, за якога кандыдата моладзь зьбірае подпісы, бралі газэты й падпісваліся за "кандыдата, пры якім ня будуць зьнікаць людзі".

Пасьля маладафронтаўцы зайшлі ў будынак пракуратуры Савецкага раёну. І вось якая ў іх адбылася размова з пракурорскімі работнікамі:

(Удзельнік акцыі: ) "Мы хочам павіншаваць вас з Днём пракурорскага работніка і хочам прапанаваць вам падпісацца за кандыдата, пры якім ня будуць зьнікаць людзі. Бачыце, у нас безьліч кандыдатаў".

(Супрацоўнік пракуратуры: ) "Я яшчэ пакуль ня вырашыў".

(Удзельнік акцыі: ) "Гэта сацыялягічнае апытаньне, гэта не за нейкага пэўнага кандыдата, гэта проста за ідэю — каб не зьнікалі людзі ў Беларусі".

(Супрацоўнік пракуратуры: ) "Я нічога не хачу, я нічога не вырашаю".

(Удзельнік акцыі: ) "Ну добра, але вы падтрымліваеце гэтую ідэю?"

(Супрацоўнік пракуратуры: ) "Можа быць".

(Удзельнік акцыі: ) "Ці хочаце вы, каб у нас не зьнікалі людзі пры наступным прэзыдэнце?"

(Іншы супрацоўнік пракуратуры: ) "Я ўстрымаюся ад камэнтара пакуль што. Я на працоўным месцы. Можа быць, у іншым месцы я вам калі-небудзь што-небудзь скажу".

Збор подпісаў праводзілі й каля іншых раённых пракуратураў Менску. Паводле Паўла Севярынца, усе сабраныя подпісы перададуць генпракурору Віктару Шэйману.



Альгерд Невяроўскі, Менск
0058045