Подпишитесь на нашу ежедневную рассылку с новыми материалами

Общество


Беларускiя наркаманы сталi значна больш спажываць сiнтэтычных наркотыкаў

На ценявым наркатычным рынку нашай краiны апошнiм часам падае попыт на опiй, гашыш, марыхуану i нават на гераiн. Аднак гэта зусiм не азначае, што наркатычная навала паступова адступае з Беларусi. Сiтуацыя, як адзначыў падчас сустрэчы з журналiстамi начальнiк аддзела па процiдзеянню незаконнаму абароту наркотыў МУС Беларусi Рамуальд Андрыеўскi, застаецца даволi складанай.

Проста айчынныя наркаманы памянялi свае «прыярытэты». Паводле слоў палкоўнiка Андрыеўскага, калi яшчэ 3-4 гады таму айчынныя «аматары кайфу» аддавалi перавагу наркотыкам раслiннага паходжання, то зараз назiраецца масавае захапленне «сiнтэтыкай», i ў прыватнасцi метадонам. Летась, напрыклад, было канфiскавана 682 грамы метадону, што ў 136 разоў больш, чым у 2000 годзе. Попыт на памянёны наркотык спарадзiў i вялiкае прапанаванне. Гандаль сiнтэтычнымi наркотыкамi прыносiць вялізныя прыбыткi. Паводле iнфармацыi палкоўнiка Андрыеўскага, 1 грам метадону каштуе на ценявым рынку 150-160 долараў. Як правiла, метадон завозяць з-за мяжы. Аднак i айчынныя вытворцы спрабуюць заняць сваё месца на гэтым рынку. Паводле слоў Рамуальда Андрыеўскага, летась i на пачатку гэтага года ў Мiнску былi выяўлены дзве падпольныя лабараторыi па вырабу метадону. Дзейнiчалi нелегальныя наркалабараторыi на базе навукова-даследчых iнстытутаў.

Вельмi актыўна апошнiм часам распаўсюджваюцца ў нашай краiне i псiхатропныя рэчывы, якiя маладыя людзi i падлеткi выкарыстоўваюць для павышэння настрою. Аб «прагрэсiруючай папулярнасцi» гэтых наркотыкаў яскрава сведчыць мiлiцэйская статыстыка. Напрыклад, за мiнулы год супрацоўнiкамi канфiскавана амаль 90 кiлаграмаў псiхатропных рэчываў, што ў 26 разоў больш, чым чатыры гады таму назад. Адметна, што псiхатропныя рэчывы (найчасцей гэта амфетамiны) распаўсюджваюцца ў месцах масавага адпачынку моладзi. Летась на дыскатэках i ў камп’ютарных клубах было выяўлена 135 злачынстваў, звязаных з наркотыкамi. Былi таксама спробы наладзiць збыт наркотыкаў у некаторых навучальных установах. Усяго за мiнулы год канфiскавана больш як 28 кiлаграмаў амфетамiнаў. «Iмпартуюцца» гэтыя наркотыкi звычайна з Польшчы i Лiтвы. А распаўсюджваюць «белую смерць» звычайна асобы, якiя нiдзе не працуюць.

Мiкола ДЗЯБЁЛА
,