/ фото: Игорь Матвеев,

Біскуп Віцебскі Алег Буткевіч 9 снежня правёў традыцыйную перадкалядную прэс-канферэнцыю. Кіраўнік дыяцэзіі распавёў пра вынікі сыходзячага года і падзяліўся планамі на будучы. У прыватнасці, размова ішла аб лёсе некаторых адметных помнікаў архітэктуры.

Фото: Игорь Матвеев
Біскуп Віцебскі Алег Буткевіч

 

Магчымасць атрымаць індульгенцыю

Алег Буткевіч паведаміў, што папа Францішак абвясціў 2016-ты юбілейным Годам міласэрнасці. Ён пачаўся 8 снежня з абраду адкрыцця Святой брамы міласэрнасці ў базыліцы Святога Пятра ў Рыме.

Унікальнасць гэтага года ў тым, што ўпершыню такія ж брамы адкрыюць па ўсім свеце, а не толькі ў Рыме. Адбудзецца гэта 13 снежня. У Віцебскай вобласці Святыя брамы адчыняцца ў двух храмах — кафедральным касцёле Езуса Міласэрнага ў Віцебску і санктуарыі Маці Божай «Валадаркі Азёраў» у Браславе.

Вернікаў запрашаюць прайсці праз такія брамы, каб сустрэцца з Божай міласэрнасцю. Лічыцца, што гэтая працэдура дазваляе атрымаць так званую індульгенцыю — вызваленне ад кары за грахі.

Лёс помнікаў архітэктуры

Зараз у дыяцэзіі праводзіцца інвентарызацыя нерухомасці — сакральных будынкаў, жылых дамоў ці памяшканняў. «Таксама зроблена інжынерная ацэнка стану касцёлаў, капліц, плябаній, манаскіх дамоў. Гэта вялікая праца, яе вынікі дазволяць аб’ектыўна ацаніць матэрыяльнае становішча дыяцэзіі», — паведаміў біскуп.

Фото: Игорь Матвеев

Фото: Игорь Матвеев
Справа: прэс-сакратар дыяцэзіі, ксёндз Віктар Місевіч

Адной з даўніх мараў Алега Буткевіча і многіх вернікаў з’яўляецца аднаўленне касцёла Святога Антонія ў Віцебску — помніка архітэктуры XVIII стагоддзя, які знаходзіўся насупраць Ратушы.

«Мы зараз імкнемся друкаваць і распаўсюджваць выяву касцёла, каб у свядомасці віцябчан гэты архітэктурны ансамбль быў запатрабаваны. Робім пэўныя крокі ў гэтым накірунку (вяртання помніка. — TUT.BY). Міністэрства культуры ўжо выразіла згоду на тое, каб касцёл быў адбудаваны на гэтым месцы (дзе гістарычна знаходзіўся. — TUT.BY). Справа вяртання будынка патрабуе згоды ўладаў, і зараз мы робім ўсё магчымае, каб гэты праект мог прайсці на самым вышэйшым узроўні. І мы ўвесь час жывём гэтай надзеяй і молімся аб тым, каб гэты прыгожы храм зноў знайшоў сваё месца там, дзе калісьці стаяў», — распавёў кіраўнік дыяцэзіі.

Раней мы паведамлялі аб тым, што ў Віцебску збіраліся знесці помнік архітэктуры ХІХ стагоддзя — будынак былой каталіцкай капліцы на тэрыторыі батанічнага сада, бо ўласнік — Віцебскі дзяржаўны ўніверсітэт, не мае 2 мільярды рублёў на яго рамонт.

Алег Буткевіч паведаміў, што рашэнне аб разбурэнні гэтага аб’екта спынена: «Зараз мы вядзем перамовы з гарадскімі ўладамі і адміністрацыяй універсітэта, каб пераняць будынак для патрэб каталіцкага касцёла. Хацеў бы асабіста падзякаваць за гэта і ўладам горада, і Міністэрству адукацыі».

Дзяленне аплатак

На заканчэнне сустрэчы біскуп Віцебскі, прэс-сакратар дыяцэзіі ксёндз Віктар Місевіч і журналісты падзяліліся аплаткамі і павіншавалі адзін аднаго з надыходзячымі святамі Божага Нараджэння і Новага года.

Фото: Игорь Матвеев
Дзяленне аплатак.

Аплатка — тонкі белы лісток з прэснага цеста, выпечаны з мукі і вады без дадатку дрожджаў. Звычайна на ім выціскаюцца выявы на тэмы Нараджэння Хрыстовага або хрысціянскія сімвалы. Збіраючыся за святочным сталом на Раство, вернікі дзеляцца аплаткамі, ламаюць іх і зычаць адзін аднаму пажаданні.

Дзяленне аплаткамі пасля прачытанага ўрыўка з Евангелля і малітвы — найважнейшы момант вігілійнай вячэры, патлумачыў біскуп Алег Буткевіч. Такім чынам чалавек ахвяруе іншаму сваю ўдзячнасць, прабачэнне, дзеліцца з ім дабрынёй, любоўю.

Фото: Игорь Матвеев

Тэлетрансляцыя імшы

Зараз у дыяцэзіі праходзіць XVI Фестываль «Дні хрысціянскай культуры». Па традыцыі ён пачаўся з адкрыцця выставы дзіцячай творчасці ў касцёле Езуса Міласэрнага ў Віцебску.

Цалкам фестывальная праграма змешчана тут.

І яшчэ адна прыемная навіна. 24 снежня вігілійную святую імшу з кафедральнага касцёла Езуса Міласэрнага ўпершыню пакажуць у прамым эфіры па абласным тэлебачанні. Пачатак трансляцыі — у 21.30.

«Мы вельмі ўдзячныя кіраўніцтву абласной тэлерадыёкампаніі за магчымасць паказаць святочную літургію. Такім чынам яе ўбачаць і змогуць памаліцца людзі, якія па розных прычынах не здолеюць быць у храме ў гэты святочны час», — адзначыў біскуп Віцебскі.

Фото: Игорь Матвеев

-80%
-20%
-20%
-10%
-25%
-15%
-20%
-20%
0070970