Подпишитесь на нашу ежедневную рассылку с новыми материалами

Общество


Рэнтабельнасьць зьнізілася летась да недапушчальна нізкага, па меркаваньні спэцыялістаў, узроўню. Запасы нерэалізаванай прадукцыі павялічыліся за год на 20% і складалі на пачатак гэтага году 35 млн. даляраў.

Трэцяя частка ад усіх прадпрыемстваў зьнізіла аб'ёмы рэалізацыі, а бартэрныя зьдзелкі, вельмі ня выгадныя для беларусаў, вакол якіх круціцца нямала махінатараў, складаюць больш за палову ад усіх кантрактаў на продаж. Сёлета, дарэчы, запасы прадукцыі на складох яшчэ больш павялічыліся, і ўвогуле, асноўныя паказчыкі па прамысловасьці ў першыя месяцы настолькі пэсымістычныя, што кіраўнікі вобласьці ўсяляк ухіляюцца ад размоў на гэтыя складаныя тэмы. Ніхто зь іх дакладна ня ведае, што будзе далей.

З усёй магілеўскай прадукцыі новая складае толькі мізэрныя 4%. Амаль 150 забаронаў на выпуск няякаснай прадукцыі атрымалі ад адпаведных органаў заводы вобласьці. Буйныя прадпрыемствы - бабруйскія "Белшыны" й "Фандок", мэталюргічны завод у абласным цэнтры - страцілі свае рынкі збыту ў Расеі з прычыны дарагавізны вытворчасьці з далёка не сучаснай тэхналёгіяй.

Самі прамыславікі вінавацяць ува ўсім аб'ектыўную рэчаіснасьць нашай дзяржавы - востры недахоп зваротных сродкаў, структура падаткаў, якая душыць вытворчасьць і разьвіцьцё новых тэхналёгій, высокія стаўкі банкаўскіх крэдытаў, заганныя мэханізмы цэнаўтварэньня. Старшыня Магілеўскага аблвыканкаму Барыс Батура, вылухаўшы аналіз працы прамыславікоў за год, выказаў шчырую ўпэўненасьць: з гэтакімі паказьнікамі сацыяльна арыентаваную эканоміку ніколі не пабудуеш.

Кіраўнік вобласьці прапанаваў галоўнымі паказьнікамі працы лічыць не аб'ёмы вытворчасьці, але асваеньне новай прадукцыі, патрэбнай спажыўцам, і вызваленьне складоў ад ужо вырабленага. Але галоўнае патрабаваньне вэртыкалі да кіраўнікоў прамысловых прадпрыемстваў старое, як савецкая дзяржава: сярод іншых важных справаў па вырабе новае прадукцыі й рэалізацыі старой, абавязкова, без усялякіх непатрэбных абмеркаваньняў, дапамагчы бездапаможным сялянам адсеецца.



Ганна Юрчанкова, Магілеў

Радыё Рацыя
,