Подпишитесь на нашу ежедневную рассылку с новыми материалами

Общество


Згодна з дакумэнтам, падпісаным кіраўніком прэзыдэнцкай адміністрацыі Міхаілам Мясьніковічам, усе паведамленьні прэсавых службаў "у першарговым парадку павінны скіроўвацца ў прэсавую службу прэзыдэнта Беларусі".

Адказнасьць за выкананьне закрытага распараджэньня ўскладаецца на першага намесьніка кіраўніка адміністрацыі прэзыдэнта Ўладзіміра Замяталіна. Сэнс дакумэнта зводзіцца да таго, што на перадвыбарчы пэрыяд праца ўсіх прэсавых службаў дзяржаўных установаў пачынае жорстка цэнзуравацца й адсочвацца прэзыдэнцкай адміністрацыяй. Менавіта на прэсавыя службы ўскладаецца не ўласьцівая ім дагэтуль роля прагандыстаў і агітатараў. Асаблівае месца на перадвыбарчы пэрыяд адводзіцца Нацыяльнаму прэсаваму цэнтру. Ён, паводле дакумэнту, павінен складаць пэрспэктыўны месячны плян прэсавых мерапрыемстваў, якія зацьвярджае асабіста Міхаіл Мясьніковіч.

Згодна з пуктам 2.3 распараджэньня, тэкст якога атрымала РР, усе прэсавыя службы дзяржаўных установаў у першарговым парадку павінны скіроўваць свае паведамленьні для СМІ "ў прэсавую службу прэзыдэнта Беларусі й Нацыянальны прэсавы цэнтар". На практыцы гэта азначае, што толькі пасьля дазволу адміністрацыі ці Нацыяльнага прэсавага цэнтру паведамленьні здолеюць пабачыць журналісты.

Акрамя таго, у дакумэнце дакладна распрацаваны плян асьвятленьня дасягненьняў афіцыйных беларускіх уладаў. Мясьніковіч раіць Савету Міністраў, аблвыканкамам ды Менгарвыканкаму "абавязаць кіраўнікоў адпаведных дзяржаўных органаў не радзей за адзін раз у квартал прымаць удзел у мерапрыемствах, якія праводзіць Нацыянальны прэсавы цэнтар, выступаць у грамадзка-палітычных і тэлерадыёпраграмах Нацыянальнай дзяржаўнай тэлерадыёкампаніі, іншых сродках масавай інфармацыі". На кіраўнікоў дзяржаўных органаў ускладаецца "пэрсанальная адказнаць за сыстэмнасьць працы са сродкамі масавай інфармацыі".

Фактычна, дакумэнт ператварае прэсавыя службы дзяржаўных установаў з органаў, прызначаных даваць інфармацыю, у органы, якія павінны інфармацыю альбо хаваць, албо інтэрпрэтаваць.

Распараджэньне Міхаіла Мясьніковіча пад №22 пабачыла сьвет у той самы дзень, калі й прэзыдэнцкі дэкрэт па ўдасканаленьні парадку атрыманьня й выкарыстаньня замежнай бязвыплатнай дапамогі, што не пакідае сумневаў адносна перадвыбарчай скіраванасьці дакумэнту. У Нацыянальным прэсавым цэнтры новую дырэктыву адміністрацыі камэнтаваць адмовіліся.



Юрась Карманаў

Радыё Рацыя