Подпишитесь на нашу ежедневную рассылку с новыми материалами

Общество


Дзяржавы, зь якімі наша краіна ўжо правяла перамовы, адзначаюць, што Беларусь мае добрую базу, каб далучыцца да гэтай міжнароднай арганізацыі. Зрэшты, праца па ўваходжаньні ў СГА праводзіцца ўжо не адзін год і можа яшчэ расьцягнуцца на няпэўны тэрмін.

Беларуская дэлегацыя на чале з намесьнікам міністра замежных справаў Аляксандрам Міхневічам ужо сустрэлася з прадстаўнікамі Аўстраліі, Канады, Злучаных Штатаў, Швэйцарыі, Польшчы ды Баўгарыі. Зараз адбываюцца перамовы з Эўрапейскім Зьвязам, Японіяй ды Вугоршчынай. Краіны-удзельніцы адзначаюць, што Беларусь мае добрую базу для далучэньня да Сусьветнай гандлёвай арганізацыі.

Паралельна з перамовамі па доступе беларускіх тавараў ды паслугаў на замежныя рынкі, у Жэнэве зь 5-га лютага праходзяць перамовы ў рамках Рабочай групы па ўваходжаньні нашай краіны ў СГА. Падчас першага дня перамоваў былі абмеркаваныя праблемы, якія тычацца зьнешнеэканамічнай дзейнасьці Беларусі ды ўнесеных зьменаў у заканадаўства, зьвязаных з уступленьнем у СГА. Ішла размова й пра праблемы, зь якімі Беларусь сутыкаецца пры ўступленьні ў Сусьветную гандлёвую арганізацыю.

У рамках перамоваў будуць абмеркаваныя магчымыя крокі ўраду па адаптацыі заканадаўства Рэспублікі Беларусь да пагадненьняў і правілаў СГА. Асобна будзе разглядацца існуючае ў Беларусі субсідаваньне сельскай гаспадаркі, перш за ўсё, датацыі гэтаму сэктару эканомікі, выкліканыя наступствамі аварыі на Чарнобыльскай АЭС.

Як паведамляе прэсавы-сакратар Міністэрства замежных справаў Павал Латушка, гэта ўжо трэцяе паседжаньне Рабочай групы Сусьветнай гандлёвай арганізацыі па Беларусі. Перамовы аб уваходжаньні нашай краіны ў СГА вядуцца тры гады, але Павал Латушка лічыць гэта нармальным.

П.Л.: Працэс уступленьня ў Сусьветную гандлёвую арганізацыю - гэта сапраўды ня справа аднаго дня. Гэта даволі складаная працэдура, якая прадугледжвае ўзгадненьне адпаведных нормаў заканадаўства той краіны, якая зьбіраецца ўступіць у СГА, з тымі нормамі ды стандартамі, якія вылучаюцца іншымі сябрамі арганізацыі. Вельмі важным зьяўляецца для нас і адначасовае ўзгадненьне гэтых працэсаў з краінамі, якія зьяўляюцца сябрамі Мытнага саюзу, і ў першую чаргу з Расейскай Фэдэрацыяй.

Такім чынам, вызначыць канкрэтныя тэрміны ўваходжаньня Беларусі ў Сусьветную гандлёвую арганізацыю пакуль складана. Па зьвестках Міністэрства замежных справаў працэс можа расьцягнуцца яшчэ на некалькі гадоў. Пасьля ўваходжаньня ў СГА наша краіна атрымае спрыяльныя ўмовы для гандлю на рынках краінаў-сябраў арганізацыі. Кіраўніцтва Беларусі мяркуе, што гэтак дзяржава здолее вырашыць праблему павелічэньня экспарту й палепшыць агульны стан эканомікі.

Юлія Шарова

Радыё Рацыя