Магілёўскія ўкраінцы не спяць начамі і спачуваюўць падзеям у Кіеве

Як ставяцца да ўкраінскай рэвалюцыі магілёўскія ўкраінцы? Чым, на іхную думку, можа скончыцца палітычнае супрацьстаянне на гістарычнай радзіме? Чаму могуць навучыцца беларусы на прыкладзе падзеяў у Кіеве?



Кіраўнік культурна-асветніцкага аб"яднання ўкраінцаў Магілёва "Дніпро" Генадзь Гузій нарадзіўся ў тым жа горадзе, што і Віктар Януковіч — у Стаханаве Данецкай вобласці. Ён зазначае, што прэзідэнт Украіны падмануў украінцаў, не падпісаўшы асацыяцыі з Эўразвязам.


Падзеі ў Кіеве суразмоўца называе трагічнымі. Пасля гібелі людзей на Майдане, кажа ён, вяртанне назад наўрад ці магчымае.

"Ужо рукі ў крыві, а гэта зусім іншая гаворка. І калі ўвесь народ украінскі падымецца, то будзе шмат крыві. 52 працэнты ўкраінцаў выказваюцца за эўрапейскае разьвіццё Ўкраіны. Ад 1991 году, ад дня абвяшчэння незалежнасці Ўкраіны вырасла новае пакаленне. Для іх бліжэй Польшча, Нямеччына. Яны едуць туды — і бачаць тамтэйшы ўзровень жыцця і стаўленне да людзей. Едуць у Расею — і бачаць, што там. Усё пазнаецца ў параўнанні. Расія — добрая краіна, але няхай яны самі сабе жывуць".

Генадзь Гузій кажа, што сам меўся быць на майдане, але ня можа дзеля сямейных прычын. Ён лічыць, што ўкраінцы самі разбяруцца ў сваіх праблемах, і асуджае замежнае ўмяшанне ў справы суверэннай Украіны:

"Неўмяшанне — гэта дужа разумна. Але калі збіраецца Дума маскоўская і прымае жорсткую заяву па Ўкраіне — хлопцы, а якая вам справа, што робіцца ва Ўкраіне? Калі ў вас адбываюцца нейкія падзеі на Балотнай плошчы — хіба Вярхоўная Рада збіралася і прымала нейкія адмысловыя заявы па Расеі? Хлопцы, вы паводзьце сябе талерантна! Лезці да нас нядобра!"

Валер Беразіенка

Трагічнымі лічыць падзеі ў Кіеве і Валер Беразіенка. Ён згодны з спадаром Гузіем, што Януковічу больш не давярае ўкраінскі народ — разам з тым засцерагае:

"На першы план выйшлі заходнія ўкраінцы. А яны дужа моцныя нацыяналісты. Клічко і іншыя — яны не валодаюць сытуацыяй. І вось гэтыя заходнія ўкраінцы твораць вэрхал у сталічным горадзе Кіеве".

На пытанне — "Чаму могуць навучыцца беларусы на прыкладзе падзеяў ва Ўкраіне?" — спадар Беразіенка адказаў:

"Дэмакратыі. Народ павінен быць разняволены. Каб ведаў свае правы. Каб ведаў, што можна дамагчыся поспеху, калі будзеш пратэставаць супраць тых рашэнняў, якія прымаюцца ўладай".

Аляксандар Сізоненка

Магілёўскі ўкраінец Аляксандар Сізоненка выказвае захапленне сваімі землякамі, якія выйшлі на Майдан. Ён асуджае кровапраліцце, адзначаючы пры гэтым, што ўкраінцы бароняць сваю свабоду.

"Я рады за іх, што яны могуць выйсці на вуліцы і выказаць сваё меркаванне. Мы ж у Беларусі, нават адзін чалавек, на жаль, выйсці і выказаць сваё меркаванне ня можам. За Ўкраіну цяпер Расея ўзялася. Дый сама Ўкраіна падзялілася — нехта за Расею, нехта — за Еўропу. Але вінаватыя расейцы разам з тым. Калі б яны туды ня ўмешваліся, то ва Ўкраіне зусім іншыя былі б падзеі. Украінцы павярнуліся б у Еўропу".

"Вельмі перажываю за сваю бацькаўшчыну. Тое, што адбываецца ва Ўкраіне, — гэта спецапэрацыя расейскіх спэцслужбаў. Тое, што ня будзе Януковіча — гэта пытанне часу. Цяпер асноўнае пытанне — захаваць краіну. Не аддаць яе ў рукі бандытам. Кіруе ўжо там далёка не Януковіч, не Азараў, а кіруюць расейскія спэцслужбы. Працуе расейскі спецназ..."