Подпишитесь на нашу ежедневную рассылку с новыми материалами

Общество


Павал Казлоўскі заявіў, што ў часе свае выбарчае кампаніі зьбіраецца абапірацца ня толькі на вайскоўцаў, сярод якіх аўтарытэт былога міністра абароны даволі высокі.

Казлоўскі: Ёсьць шэраг грамадзкіх арганізацыяў, іншых партыяў, якія гатовыя дапамагчы. Вельмі істотна абапірацца ня толькі на палітычныя партыі, хаця яны вельмі важныя, але на ўвесь грамадзка-палітычны спэктар. Посьпех будзе за тым, за кім будзе шырокае грамадзкае кола.

На погляд Паўла Казлоўскага, да часу рэгістрацыі прэтэндэнтаў на пасаду прэзыдэнта апазыцыя не павінна вылучаць адзінага кандыдата. Ёсьць рэальная небясьпека - адзначыў экс-міністар абароны -: улады могуць перашкодзіць яму зарэгістравацца. Зьбіраючы подпісы за некалькіх кандыдатаў, апанэнтаў Лукашэнкі, можна сабраць у цэлым больш за мільён аўтографаў грамадзян, правёўшы гэткім чынам вялікую агітацыйную кампанію. А пасьля таго ўжо, як некалькі або адзін з прадстаўнікоў дэмакратычнага лягеру возьме рэальны ўдзел у выбарах, можна будзе казаць пра аб'яднаньне.

КАЗЛОЎСКІ: На першым этапе мусяць быць некалькі кандыдатаў. Тады ёсьць шанец хаця б аднаму быць зарэгістраваным. І калі некалькі, альбо нават адзін, будзе зарэгістраваным, то пасьля гэтага астатнія могуць далучыцца да ягонай кампаніі й аддаць яму свае галасы.

Павал Казлоўскі не адмаўляе магчымасьці ўціску на яго з боку дзяржавы ў часе выбарчае кампаніі. Зьнікненьні вядомых апазыцыйных палітыкаў, журналіста Зьмітра Завадзкага, арышты апанэнтаў рэжыму й суды над імі, - падкрэсьліў Павал Казлоўскі, - сталіся звычайнаю зьяваю ў Беларусі. Аднак Казлоўскага гэта не палохае.

КАЗЛОЎСКІ: Гэта вельмі тыповая для цяперашняга часу сытуацыя ў нашай краіне. Калі зьнікаюць вядомыя палітыкі, то аніхто не застрахаваны ад таго, што зь ім можа здарыцца. Хаця я гэтага ня вельмі баюся. Хтосьці мусіць рабіць нешта для зьмяненьня становішча.

Павал Казлоўскі паведаміў, што апошнімі днямі пачаўся ціск на яго самога: экс-міністар абароны быў выкліканы ў вайсковую пракуратуру. Праз 8 гадоў па сыходзе Паўла Казлоўскага з пасады міністра абароны пракуратура пачала шукаць крымінал у продажы ягоным ведамствам мэталялому, атрыманага праз ажыцьцяўленьне праграмы канвэрсіі. Чаму гэтая справа ўсплыла толькі цяпер - на думку Паўла Казлоўскага, - здагадацца няцяжка.

І яшчэ адзін момант, пра які распавёў Павал Казлоўскі журналістам 23 лютага. Зранку гэтым днём ён, апрануўшыся ў генэральскі строй, скіраваўся на пляц Перамогі, дзе тым часам Аляксандар Лукашэнка ўскладаў вянкі да помніка. Як паведаміў Павал Казлоўскі: "Да "цела" не былі дапушчаны прадстаўнікі Беларускага саюзу афіцэраў, якія хацелі разам з кіраўніком краіны пакласьці кветкі да помніка Перамогі". Апошнім часам - сказаў экс-міністар абароны - сябры Саюзу, якія сымпатызуюць Лукашэнку, выказваюць незадаволенасьць стаўленьнем кіраўніка дзяржавы да арганізацыі. Са словаў экс-міністра, яму было брыдка глядзець, як Лукашэнка падзяляе грамадзтва паводле прынцыпу "хто ня з намі, - той супраць нас".

Супраць гэткага падзелу Павал Казлоўскі таксама зьбіраецца змагацца ў разе, калі будзе абраны на пасаду прэзыдэнта Беларусі.

Генадзь Кесьнер

Радыё Рацыя
,