Подпишитесь на нашу ежедневную рассылку с новыми материалами

Общество


Патрыярх маскоўскі й усяе Русі Аляксій ІІ зьвярнуўся да А.Лукашэнкі з просьбай дапамагчы ў вырабе царкоўнай рыштунку для маскоўскага сабору Хрыста Збаўцы. Было вырашана, што беларускае кіраўніцтва возьме на сябе выраб вялікіх урачыстых харугваў. Намесьнік Дзяржкамітэту ў Справах Рэлігіяў і Нацыянальнасьцяў Рэспублікі Беларусь Іван Яновіч распавёў, што харугвы будуць падобныя да тых, што былі раней у гэтай царкве.

І.Я.: - Гэтыя харугвы, якія стаяць каля галоўнага алтара гэтага храма й маюць памер разам з дрэўкам каля 7 м, а само палотнішча харугваў 3,5 м. Яны вырабляюцца па тых рэштках, якія захаваліся ў музеях, а таксама па фатаграфіях, малюнках, якія захаваліся ў храме. Мы праводзілі нават тэндэр для таго, каб знайсьці ў Беларусі спэцыялізаваную фірму, якая магла б узяцца за гэтую працу. Аднак у сувязі з тым, што тэрміны былі невялікія й патрэбна было працаваць у музэях і архівах Расеі, вырашана было даверыць гэтую працу маскоўскай фірме "Парура". Мы фінансуем гэтую працу, кантралюем яе ход. Магчыма, у красавіку, магчыма, трошкі пазьней гэтыя харугвы будуць урачыста перададзеныя гэтаму храму. Вельмі высокія мастацкія патрабаваньні да гэтых вырабаў. На іх будуць іконы, срэбнае шыцьцё, залатыя й срэбныя ўзоры. Гэта высокамастацкі твор, над ім працуюць ювэліры й мастакі.

А.Д.: - Колькі грошай і зь якіх фондаў выдзелена на выраб гэтых харугваў?

І.Я.: - Сродкі гэтыя выдзеленыя з рэзэрвавага фонду прэзыдэнта яшчэ ў мінулым годзе ў памеры $100.000, - столькі каштуюць гэтыя два вырабы.

$100.000 - гэта бадай найвялікшая сума, якую кіраўнік Беларусі выдзеліў са свайго фонду для Расейскай Праваслаўнай Царквы. Прычым грошы атрымала расейская фірма. Такім чынам улады Беларусі чарговы раз не скарысталі магчымасьці падтрымаць беларускіх вытворцаў. Дарэчы, у 1999 г. Лукашэнка накіраваў вялікую харчовую дапамогу для расейскіх праваслаўных манастыроў і духоўных навучальных установаў. Апроч таго, беларускае кіраўніцтва фінансуе рэканструкцыю аб'ектаў РПЦ у Расеі. Гэтак, вялікія фінансавыя сродкі былі выдзеленыя на рэканструкцыю Новаерусалімскага манастыра пад Масквою.

І.Я.: - Пасьля такой просьбы й яе выкананьня да нас прыйшло даволі многа такіх просьбаў у дапамозе, прычым не толькі з цэнтру Расеі, але і з Каўказу й Украіны, на жаль, такіх магчымасьцяў у нас недастаткова, каб дапамагчы ўсім, хто мае патрэбу.

Натуральна, што для беларускага кіраўніцтва важней дапамагчы Маскве. А.Лукашэнка, які лічыць сябе праваслаўным атэістам, зьбіраецца асабіста ўручыць гатовыя харугвы маскоўскай царкве. Гэта будзе адна з рэклямных акцыяў перадвыбарчай прэзыдэнцкай кампаніі.

Аляксандар Дашчынскі

Радыё Рацыя
,