Подпишитесь на нашу ежедневную рассылку с новыми материалами

Общество


Звольнены дырэктар Фонду дзяржаўнай маёмасьці Міністэрства эканомікі Генадзь Падгорны — "за неаднаразовае парушэньне працоўных абавязкаў". Адпаведную пастанову Савету Міністраў падпісаў яшчэ 10 лютага прэм’ер Генадзь Навіцкі. За што канкрэтна спадара Падгорнага пазбавілі пасады, ніхто не тлумачыць.

Як піша сьвежы нумар штотыднёвіка "Белорусская газета", урадавая крыніца паведаміла, што звальненьне дырэктара фонду дзяржмаёмасьці зьвязанае з продажам беларускага пакету акцыяў кампаніі "Слаўнафта". Амаль 11 адсоткаў акцыяў гэтай расейска-беларускай кампаніі былі прададзеныя адзінаму ўдзельніку аўкцыёну — "Слаўнафтабанку", які ёсьць даччынай фірмай "Слаўнафты", — за 207 мільёнаў даляраў. Беларускія ўлады спадзяваліся атрымаць за гэты пакет на 40–100 мільёнаў даляраў больш.

Гэта нібыта й выклікала абурэньне Аляксандра Лукашэнкі, які, паводле "Белорусской газеты", на наступны дзень пасьля звальненьня дырэктара фонду дзяржмаёмасьці пабачыў яго падчас сустрэчы з урадам і спытаўся: "А што ён тут робіць?" Паводле сьведкі, спадар Лукашэнка далей заявіў, што Беларусь згубіла падчас продажу "Слаўнафты" 47 мільёнаў даляраў.

Але Лукашэнкава прэсавая сакратарка Натальля Пяткевіч гэтае паведамленьне не пацьвярджае:

(Пяткевіч: ) "Я ня чула такой заявы прэзыдэнта на нарадзе. Заява прэзыдэнта, якую вы падалі, на нарадзе ня мела месца".

Апытаныя "Белорусской газетой" экспэрты заяўляюць, што продаж быў праведзены правільна й што калі б ён адбыўся пазьней, пасьля продажу расейскага пакету з трох чвэрцяў акцыяў "Слаўнафты", дык беларускія акцыі ўвогуле б ніхто не купіў. Аднак некаторыя іншыя адмыслоўцы мяркуюць, што прэтэнзіі да спадара Падгорнага могуць мець грунт.

Цікава, што ў дзень звальненьня спадара Падгорнага пытаньні разьдзяржаўленьня маёмасьці зь ягоным непасрэдным начальнікам — міністрам эканомікі й віцэ-прэм’ерам Андрэем Кабяковым — абмяркоўвала місія Міжнароднага валютнага фонду. Пасьля сустрэчы зь віцэ-прэм’ерам 10 лютага кіраўнік місіі Томас Рычардсан заявіў:

(Рычардсан: ) "Мы думаем, што важна рухацца наперад з прыватызацыяй, але рабіць гэта такім шляхам, які зьяўляецца празрыстым, канкурэнтным і арыентаваным на атрыманьне як мага большых паступленьняў у бюджэт. Адна зь ідэяў, якія мы абмеркавалі, — гэта мажлівасьць стварэньня прыватызацыйнага фонду, дзе б акумуляваліся паступленьні ад прыватызацыі, якія потым выдаткоўваліся б зь цягам часу на важныя, доўгатэрміновыя сацыяльныя патрэбы".

Томас Рычардсан дадаў, што такі прыватызацыйны фонд меў бы кантралявацца парлямэнтам, як і дзяржаўны бюджэт. Пакуль жа вядома, што падчас продажу беларускай часткі "Слаўнафты" канкурэнтаў адзіны пакупнік ня меў, а на што пойдуць атрыманыя за гэты пакет грошы — ніхто ня ведае.

Камітэт дзяржаўнай бясьпекі, куды зьвяртаўся па тлумачэньні дырэктар фонду дзяржмаёмасьці, таксама ня ведае прычыну яго звальненьня. Афіцыйны прадстаўнік КГБ Аляксандар Базанаў кажа:

(Базанаў: ) "Буйныя інвэстыцыйныя праграмы суправаджаюцца дзейнасьцю КГБ. Я ня ведаю, ці мела гэта месца ў гэтым выпадку. Але мы да Падгорнага дачыненьня ня маем і рашэньні ўраду не камэнтуем".

На думку іншых людзей, зь якімі я паразмаўляў, ніякага дачыненьня ён да "Слаўнафты" ня мае.

З гэтай заявай спадара Базанава з КГБ супадае вэрсія Аляксандра Трызонава, дарадцы віцэ-прэм’ера Кабякова:

(Трызонаў: ) "Ведаеце, яго звольнілі за неаднаразовыя парушэньні ў ягонай працы. Ведаю, што за "плённую працу" ў адваротным сэнсе".

Юры Сьвірко, Менск