Подпишитесь на нашу ежедневную рассылку с новыми материалами

Общество


Газэта Фэдэрацыі прафсаюзаў Беларускай "Беларускі час" атрымала новага рэдактара. Ім прызначаная журналістка Сьвятлана Балашова. На сустрэчы з рэдакцыйным калектывам яна заявіла, што кардынальных зьменаў у палітыцы выданьня рабіць ня будзе.

Больш за тры месяцы крэсла галоўнага рэдактара прафсаюзнай газэты "Беларускі час" было вакантным. Пасьля абраньня старшынём ФПБ Леаніда Козіка было зразумела, што ранейшы рэдактар Аляксандар Старыкевіч больш кіраваць калектывам ня будзе. Ён сышоў, разам зь ім - яшчэ некалькі журналістаў. Гэтыя тры месяцы да друку выданьне падпісвала намесьнік галоўнага рэдактара Ірына Германовіч. І вось - прызначэньне, якому зьдзіўляцца асабліва ня выпадае, зважаючы хаця б на тое, што й двума намесьнікамі кіраўнік ФПБ Леанід Козік узяў людзей, якія доўгі час працавалі ў дзяржаўным апараце. Новым рэдактарам "Беларускага часу" прызначаная Сьвятлана Балашова. Папярэдне 5 год яна працавала намесьнікам галоўнага рэдактара тыднёвіка "7 дней", які цяпер рэдагуе кіраўнік адной з кампартыяў Віктар Чыкін, а таксама - у Дырэкцыі праграм Белтэлерадыёкампаніі.

На сустрэчы з калектывам газэты новы рэдактар паведаміла, што ня будзе рабіць кардынальных зьменаў у напрамку выданьня. Палітыка на старонках газэты будзе прысутнічаць толькі ў выглядзе камэнтару дзяржчыноўнікаў да артыкулаў на актуальныя тэмы жыцьця. Новы кіраўнік паабяцала дапамагчы ў вырашэньні пытаньня аснашчэньня тэхнікай. Рэч у тым, што з наступнага году "Беларускі час" хоча паспрабаваць друкавацца ў колеры, што запатрабуе лепшай матэрыяльнай базы й большых выдаткаў.

Сёньня газэта перажывае свае ня лепшыя фінансавыя дні. Вынікі падпіскі былі несуцяшальнымі - наклад выданьня зьменшыўся. Адментнасьць газэты ў тым, што на яе існуе індывідуальная ды ведамасная падпіска - апошняя даражэйшая ў некалькі разоў. Па ведамаснай падпісцы выданьне атрымліваюць установы, а таксама пярвічкі прафсаюзных камітэтаў. Апошнія абавязаныя падпісвацца на газэту ФПБ, аднак ня ўсе робяць гэта, часам - з-за адсутнасьці жаданьня, часам - ня маюць грошай. Наклад па ведамаснай падпісцы цяпер зьменшыўся ўдвая. Па індывідуальнай - вырас на тысячу асобнікаў. Таму гаварыць пра адсутнасьць цікавасьці да выданьня з боку чытачоў ня выпадае.

Газэта на сёньня застаецца адметнай яшчэ й таму, што не падае інфармацыю, зважаючы на інтарэсы ўлады, а таксама асобных палітычных партыяў. Як жыве й выжывае просты працаўнік, што яго хвалюе дома й на працы, куды яму зьвяртацца, калі пакрыўдзяць - такія тэмы ў кожным нумары асьвятляе "Беларускі час". Новы рэдактар паабяцала, што яны застануцца й надалей.

Радыё Рацыя