Подпишитесь на нашу ежедневную рассылку с новыми материалами

Общество


Да двох гадоў зьняволеньня пагражае адвакату Ігару Аксёнчыку, які зьвінаваціў цяперашняга Генэральнага пракурора Беларусі Віктара Шэймана за прыналежнасьць да выкраданьня Зьмітра Завадзкага. Працэс над адвакатам распачаўся ў аўторак у Ленінскім судзе Менску.

На заявы Ігара Аксёнчыка першым адрэагаваў сам Віктар Шэйман. Ён зьвярнуўся у суд з просьбай завесьці супраць Аксёнчыка крымінальную справу паводле факту паклёпу (арт.188 КК РБ). "Я па-ранейшаму лічу, што цяперашні Генэральны пракурор Шэйман павінен быць дапытаны ў якасьці асноўнага падазраванага ў справе зьнікненьня апэратара ОРТ Зьмітра Завадзкага" - заявіў Ігар Аксёнчык. Ён таксама мяркуе, што памянёныя сьцьверджаньні ня ёсьць абразай ці паклёпам, бо вынікаюць з матэрыялаў справы.

Сам Генэральны пракурор на працэс не зьявіўся. Ягоны прадстаўнік сп.Стук ад размоваў з прэсай адмовіўся. Ігар Аксёнчык прадстаўляў інтарэсы сям'і Завадзкага на гучным судовым працэсе ў справе банды Ігнатовіча. Чацьвёра былых супрацоўнікаў беларускіх спэцслужбаў у сакавіу 2002 году былі засуджаныя на розныя тэрміны зьняволеньня па вінавачаньні за выкраданьне апэратара. Аднак сваёй віны на працэсе яны не прызналі.

Ігар Аксёнчык і тады і цяпер настойвае на тым, што ў справе павінен быць дапытаны Віктар Шэйман, які ў час зьнікненьня Завадзкага быў шэфам Рады Бясьпекі Беларусі. Замест гэтага Шэйман заняў месца Генпракурора.

У сакавіку сёлета Ігар Аксёнчык быў пазбаўлены ліцэнзіі адваката Менскай гарадзкой калегіі адвакатаў. Апэратар ОРТ Завадзкі быў выкрадзены ў раёне аэрапорту "Менск-2" 7 ліпеня 2000 году. Ягонае цела дагэтуль ня знойдзена. Апазыцыя й сваякі зьніклага настойваюць на тым, што да выкраданьня журналіста непасрэднае дачыненьне маюць уладныя структуры.

Радыё Рацыя
0058045