Подпишитесь на нашу ежедневную рассылку с новыми материалами

Общество


Дзяржаўны дэпартамэнт Злучаных Штатаў Амэрыкі ў сваім штогадовым дакладзе, рэпрэзэнтаваным у панядзелак, назваў шэраг краінаў, якія лічацца парушальнікамі свабоды рэлігіяў. У гэты "чорны сьпіс", "дзякуючы" дзеяньням сёньняшняга Нацыянальнага сходу, трапіла й нашая краіна.

(паводле матэрыялаў замежных мэдыяў)

Урады Кітаю, Кубы, Паўночнай Карэі, В'етнаму, Лаосу й М'янмы зьяўляюцца самымі злоснымі парушальнікамі свабоды рэлігіяў у сьвеце. Гэткая выснова ўтрымліваецца ў новым штогадовым дакладзе Дзяржаўнага дэпартамэнту ЗША аб стане свабоды веравызнаньняў у розных краінах. Даклад учора накіраваны ў амэрыканскі Кангрэс.

Прадстаўляючы дакумэнт, амбасадар Джон Хэнфорд, які займаецца ў Дзяржаўным дэпартамэнце гэтай праблемай, заявіў: названыя краіны аднесеныя да катэгорыі "таталітарных і аўтарытарных рэжымаў, якія часта разглядаюць выяўленьне рэлігійных поглядаў як пагрозу іхнаму кантролю над грамадзтвам".

Сур'ёзную заклапочанасьць ЗША выклікае сытуацыя ў Саудаўскай Арабіі, Судане, Іране, Іраку, Пакістане, Індыі, Узбэкістане й Туркмэніі, дзе працягваюцца перасьледы рэлігійных меншасьцяў. Сярод былых савецкіх рэспублік пад жорсткую крытыку Дзярждэпартамэнту падпала й Беларусь. Дзяржаўны дэпартамэнт лічыць, што парлямэнт нашай краіны "ўхваліў адзін з самых рэпрэсіўных законаў аб рэлігіі ва ўсёй Эўразіі".

Непакоіць амэрыканскіх экспэртаў і гэткая зьява, як тэрарыстычныя групоўкі, якія спрабуюць падвесьці пад сваю дзейнасьць рэлігійную аснову, - з прыкладу "Аль-Каіды". Адзінай краінай, дзе за апошнія гады адбылося істотнае паляпшэньне сытуацыі ў галіне свабоды рэлігіі, названы Аўганістан, які з дапамогаю амэрыканскіх войскаў пазбавіўся рэжыму талібаў.

Абмежаваньне свабоды рэлігіяў назіраецца й у Расеі. У дакладзе Дзярждэпартамэнту адзначаюцца факты варожага стаўленьня ў некаторых расейскіх рэгіёнах да мусульман, праявы антысэмітызму, адмовы ва ўязных візах каталіцкім сьвятаром, перасьлед рэлігійных меншасьцяў. У зьвязку з публікацыяй дакладу дзяржаўны сакратар ЗША Колін Паўэл выказаў спадзяваньне на тое, што ён стане асноваю супрацоўніцтва зь іншымі краінамі - з мэтаю ўмацаваньня свабоды рэлігіяў і абароны фундамэнтальных правоў чалавека ва ўсім сьвеце.

Радыё Рацыя
,