Подпишитесь на нашу ежедневную рассылку с новыми материалами

Общество


Гэтымі днямі Беларусь наведаў Багдан Андрусішын - журналіст радыё "Свабода", які жыве й працуе ў Празе. У Беларусі ж яго больш ведаюць як Данчыка - без сумневаў, культавага ў адраджэнскіх колах сьпевака, чые запісы дагэтуль захоўваюцца й тыражуюцца на радзіме. Нягледзячы на тое, што Багдан Андрусішын ня быў у Беларусі вось ужо 6 гадоў і, як высьвятляецца, больш не сьпявае. 11-га верасьня Данчык пагадзіўся пагутарыць з карэспандэнтам Рацыі.

RR: - Вас ня толькі й нават ня столькі ведаюць па працы на Радыё Свабода (хаця чуюць апошнім часам найперш адтуль), але й як выканаўцу цудоўных беларускіх песень. Чаму Вы цяпер не прыяжджаеце, каб канцэрт нейкі наладзіць, да прыкладу: ці ня тое месца, ці ня той час, ці ня той стан душы?..

Д.: - Проста я вельмі даўно не сьпяваю. А калі прыяжджаць з канцэртамі, то трэба быць добра падрыхтаваным. Я заўсёды вельмі сур'ёзна да гэтага ставіўся й не хачу "абы-як" выступаць перад людзьмі. Можа, некалі нагода будзе, але пакуль што вельмі заняты на працы й няма часу на сьпевы.

Данчык кажа, што ня быў у Беларусі 6 гадоў: аднойчы яму адмовілі ў візе, ды й гэтым разам "цягнулі да апошняга". Аднак спатканьне зь Беларусьсю пакінула ў яго надзвычай прыемныя ўражаньні.

Д.: -Вельмі добра, прыемна правёў час. Менск нагэтулькі зьмяніўся на лепшае: кавярні, рэстараны, Камароўскі рынак учора адведалі… Вельмі добра ўсё. Неяк у мяне аптымістычны настрой - што хутка, можа, будуць зьмены нейкія.

Прыезд Данчыка ў Менск супаў з гадавінаю тэрактаў у ЗША. Нарадзіўшыся ў Нью-Ёрку, Багдан Андрусішын вельмі любіць гэты горад і блізка да сэрца прыняў трагедыю 11-га верасьня.

Д.: - Я ў Эўропе ўжо 10 гадоў жыву, але гэта мой родны горад, і вельмі цяжка было, калі гэта здарылася… Я быў у лістападзе мінулага году - гэта праз 2 месяцы пасьля тэракту, - паехаў у той раён, і вельмі цяжкое ўражаньне было. Цэлы раён такі ціхі - для Нью-Ёрку гэта нешта неверагоднае. Людзі ішлі моўчкі, са сьлязамі на вачох. Смурод там яшчэ стаяў, і руіны гэтыя яшчэ стаялі…

Але з 11-га верасьня чалавецтва зрабіла вельмі важныя высновы. "Цывілізаваны сьвет асэнсаваў вялікую пагрозу й аб'яднаўся, каб зь ёй змагацца. Такое здарылася ўпершыню ў гісторыі чалавецтва", - сказаў Данчык.

Радыё Рацыя
,