Подпишитесь на нашу ежедневную рассылку с новыми материалами

Общество


Адзін з сузаснавальнікаў "Свободных новостей", Сяргей Атрошчанка, які стаў ініцыятарам "пахаваньня" выданьня, зьвярнуўся ў пракуратуру. Цяпер ён вінаваціць выдаўцоў "Свободных новостей Плюс" за выкарыстаньне ягонай інтэлектуальнай уласнасьці й карыстаньне гандлёвай маркай. Абураны галоўны рэдактар "СН Плюс" Аляксандар Уліцёнак называе дзеяньні Атрошчанкі "беспрэцэдэнтнымі па сваім нахабстве". У пятніцу, 6 верасьня, Уліцёнак быў выкліканы ў пракуратуру.

У пятніцу галоўны рэдактар штотыднёвіка "Свободные новости Плюс" Аляксандар Уліцёнак быў выкліканы ў пракуратуру, дзе яго азнаёмілі з заявай аднаго з сузаснавальнікаў "СН" - Сяргея Атрошчанкі. Цяпер сп. Атрошчанка вінаваціць "СН Плюс" за выкарыстаньне гандлёвай маркі выданьня й інтэлектуальнай уласнасьці. Высьветлілася, што ў красавіку сёлета Атрошчанка пасьпеў запатэнтаваць назву "Свободные новости", што й дало яму магчымасьць зьвярнуцца са скаргай у пракуратуру. Мэта звароту ў пракуратуру - вядома ж, зачыніць "Свободные новости Плюс", два нумары якіх ужо зьявіліся пасьля "пахаваньня" "СН".

Дзеяньні Атрошчанкі сталі поўнай нечаканасьцю для іншых трох сузаснавальнікаў "СН". Аляксандар Уліцёнак паведаміў: усе трох сузаснавальнікі не былі паінфармаваныя пра тое, што Атрошчанка пасьпеў запатэнтаваць гандлёвую марку выданьня. Але нават у гэтым выпадку, зь перакананьня Ўліцёнка, нельга лічыць ідэнтычнымі назвы "Свободные новости" й "Свободные новости Плюс", бо "ў такім разе ўсе выданьні, якія ў сваёй назве ўтрымліваюць словы "навіны", "беларуская", "газэта", "свабода" й г.д., могуць вылучаць такія ж прэтэнзіі". Ні пра якую інтэлектуальную ўласнасьць Атрошчанкі, паводле Ўліцёнка, нельга весьці гаворку.

Аляксандра Ўліцёнка таксама зьдзівіла тая апэратыўнасьць, зь якой пракуратура пачала рэагаваць на зварот Атрошчанкі. Гэта, як лічыць спадар Уліцёнак, "наводзіць на думку пра сплянаваную акцыю, мэта якой - поўнае зьнішчэньне выданьня". Нагадаю: у сярэдзіне жніўня Аляксандар Атрошчанка зьвінаваціў "СН" за тое, што газэта няздольная быць камэрцыйным праектам і атрымлівае грантаўскую дапамогу.

Міністэрства інфармацыі стала на бок аднаго з чатырох сузаснавальнікаў выданьня й прыпыніла друк "СН". Гучныя выказваньні Атрошчанкі аказаліся стартавым сыгналам для беларускіх уладаў, якія пачалі вінаваціць Злучаныя Штаты за фінансаваньне недзяржаўнага беларускага друку. Гэтая сытуацыя, дарэчы, справакавала зварот Беларускай асацыяцыі журналістаў да міністра інфармацыі Міхаіла Падгайнага з заклікам пакінуць сваю пасаду.

Паралельна, дарэчы, спадар Атрошчанка стаў сузаснавальнікам штотыднёвіка "Обозреватель", які нельга папракнуць за неляяльнасьць да ўладаў. Выглядае на тое, што цяпер абкатваюцца розныя сцэнары закрыцьця недзяржаўных СМІ: за апошнія месяцы з той ці іншай падставы спынілі сваё існаваньне 9 незалежных беларускіх мэдыяў.

Радыё Рацыя