Подпишитесь на нашу ежедневную рассылку с новыми материалами

Общество


Упраўляючы справаў Беларускай аўтакефальнай праваслаўнай царквы на тэрыторыі Беларусі, мітрафорны пратаярэй Ян Спасюк распаўсюдзіў заяву, у якой гаворыцца, што, "нягледзячы на ціск з боку ўладаў, БАПЦ не зьбіраецца кідаць сваіх прыхажан і будзе працягваць дзейнасьць, накіраваную на адраджэньне прыходаў БАПЦ, на аднаўленьне разбуранага й на будаўніцтва новых храмаў".

Нагадаю, што на пачатку жніўня з рашэньня мясцовых уладаў у пасёлку Пагранічны Бераставіцкага раёну Гарадзенскай вобласьці быў разбураны ўзьведзены храм і дом сьвятара Беларускай аўтакефальнай праваслаўнай царквы Яна Спасюка.

"Гэтым самым - падаецца ў заяве айца Яна - уладамі было груба парушана канстытуцыйнае права грамадзян на свабоду веравызнаньня. Пачуцьці вернікаў-хрысьціян абразілі як дзяржаўныя мужы й іхныя неразумныя прысьпешнікі, так і асобныя сьвятары Беларускага Экзархату Маскоўскай Патрыярхіі. З бласлаўленьня гэтых сьвятароў зьбіваліся крыжы, як гэта было ў чорныя часы ваяўнічага камуністычнага атэізму. Бераставіцкія ўлады й "благачынны" Бераставіцкай акругі пратаярэй Сергій (Шэлест) працягваюць аказваць ціск на вернікаў, якія падтрымліваюць БАПЦ , пагражаючы ім і іхным блізкім перасьледам - як у вытворчай дзейнасьці, так і ў спраўленьні рэлігійных службаў".

Як падкрэсьліваецца далей у заяве Яна Спасюка, "улады вырашылі не спыняцца на дасягнутым. Імі рыхтуецца чарговая правакацыя. Бліжэйшым часам дзяржаўныя сродкі масавай інфармацыі шырока распаўсюдзяць ілжывыя зьвесткі пра амаральныя ўчынкі, што быццам бы мелі месца ў асяродзьдзі сьвятарніцтва БАПЦ. Гэтыя спробы ачарненьня няўгодных шляхам распаўсюду загадзя ілжывай інфармацыі кампрамэнтавальнага характару добра засвоены "байцамі нябачнага фронту" й накіраваны, перш за ўсё, на дыскрэдытацыю сярод вернікаў кіраўніцтва Беларускай аўтакефальнай праваслаўнай царквы, на распальваньне міжканфэсійнай варожасьці."

"Нягледзячы на ціск з боку ўладаў - азначана далей у заяве - БАПЦ не зьбіраецца кідаць сваіх прыхажанаў і будзе працягваць дзейнасьць, скіраваную на адраджэньне прыходаў БАПЦ, на аднаўленьне разбуранага й на будаўніцтва новых храмаў. У гэты нялёгкі час прыхільнікі БАПЦ зьвяртаюцца да ўсіх вернікаў, да міжнароднай грамадзкасьці, да ўрадаў усіх краін з просьбай аказаць магчымую дапамогу ў справе адраджэньня духоўнасьці народу Беларусі".

Радыё Рацыя