Подпишитесь на нашу ежедневную рассылку с новыми материалами

Общество


Беларусі ўрад адмовіўся падпісаць са швэцкай кампаніяй ІКЕА інвэстыцыйнае пагадненьне на 25 млн. даляраў. У кампаніі заявілі, што гэта "лепшым чынам паказвае інвестыцыйны клімат у Беларусі". Швэды зачыняюць дзейнасьць ў Беларусі і ідуць у Расею.

Hа 30 жніўня кампанія ІКЕА заявіла пра закрыцьцё у Беларусі сваёй дачэрняй кампаніі Swedwood Polotzk і перавод 25 млн даляраў, якія зьбіралася інвэставаць у Беларусь цягам пяці гадоў, на расейскі рынак.

Swedwood меўся ўкласьці сродкі ў будаўніцтва дрэваапрацоўчых заводаў у Беларусі - летась у жніўні нават было зарэгістраванае прадпрыемства, якое мусіла будаваць у пасёлку Фарынава Полацкага раёну дрэваапрацоўчы завод. Урад Беларусі напачатку з гэтым пагаджаўся, аднак пасьля запатрабаваў, каб інвэстыцыі ішлі не на будаўніцтва заводу ІКЕА, а ў мадэрнізацыю ўжо існых беларускіх дрэваапрацоўчых заводаў, дзе б швэды атрымалі толькі частку акцыяў.

"Больш за пяць месяцаў мы чакалі ад беларускага ўраду рашэньня, аднак, акрамя цяганіны й усе новых патрабаваньняў, мы не атрымалі нічога. Гэтая сытуацыя ілюструе інвэстыцыйны клімат у Беларусі", - заявіла Рацыі прадстаўніца ІКЕА ў Менску.

"Швэды жадаюць толькі атрымаць беларускі лес, нічога не даючы ўзамен", - заявіў прэсавы сакратар беларускага ўраду Іван Знаткевіч.

Паўтара года таму зьявілася рамкавая дамова паміж швэдамі й Мінэканомікі Беларусі пра намер інвэставаць у лесапрамысловую галіну Беларусі цягам пяці гадоў 25 млн даляраў. Чакалася, што пагадненьне зь беларускім урадам будзе падпісанае у траўні 2002 году.

Кампаніі IKEA ў нашым рэгіёне Эўропы патрэбны дрэваапрацоўчы завод поўнага цыклу. Катэгарычна супраць плянаў ІКЕА выступіў беларускі канцэрн "Беллеспаперпрам", якія асьцерагаецца канкурэнцыі.

З сур'ёзнымі праблемамі ў Беларусі сутыкаюцца як расейскія, так і заходнія інвэстары. Нагадаю, расейскі бровар "Балтыка", які інвэставаў ў бровар "Крыніца" 10 млн даляраў, пачаў дэмантаж свайго абсталяваньня пасьля патрабаваньняў Аляксандра Лукашэнкі пабудаваць лядовы палац. З сур'ёзнымі праблемамі ў Беларусі сутыкаецца й сетка рэстрацыяў McDonald's.

Радыё Рацыя
0058648