Подпишитесь на нашу ежедневную рассылку с новыми материалами

Общество


Паседжаньне Савету Міністраў Саюзнай дзяржавы Беларусі й Расеі адбудзецца ў Маскве 17 верасьня. Пра гэта паведаміў у панядзелак дзяржсакратар Саюзнай дзяржавы Павал Барадзін на паседжаньні Сталага Камітэту, прысьвечаным падрыхтоўцы пытаньняў парадку дня Саўміну.

Мяркуецца, што на паседжаньне Савету Міністраў будзе вынесена 13 пытаньняў. Сярод іншага, удзельнікі нарады плянуюць абмеркаваць і праект Канстытуцыйнага акту.

Гэта сьведчыць пра тое, што заявы прэзыдэнта Расеі Уладзіміра Пуціна пра ягонае бачаньні далейшай інтэграцыі не паўплывалі на працу над праектам Канстытуцыйнага акту Саюзнай дзяржавы. Як вядома, працу над Канстытуцыйным актам зь беларускага боку курыруе цяперашні старшыня Фэдэрацыі прафсаюзаў Беларускай Леанід Козік.

Кіраўніку найбуйнейшай грамадзкай арганізацыі краіны, якую спадар Козік ачоліў толькі месяц таму і ў якой назьбіралася безьліч праблемаў, - сапраўды дзіва - удаецца сумяшчаць яшчэ й кантроль за ўборкай ураджаю ў Віцебскай вобласьці, а таксама й працу над сур'ёзным дакумэнтам - Канстытуцыйным актам. Паводле словаў Леаніда Козіка, "канчатковы варыянт праекту Канстытуцыйнага акту павінен быць прапанаваны на разгляд Найвышэйшага дзяржсавету Саюзнай дзяржавы ў чацьвертым квартале. Праца над Канстытуцыйным актам па-ранейшаму вядзецца, ніякіх афіцыйных дакумэнтаў, зьвязаных з ініцыятывай Пуціна, у працоўнай групе няма". Маўляў, адзіным афіцыйным паведамленьнем была тэлевізійная прэсавая канфэрэнцыя прэзыдэнтаў, а вось загадаў скарэктаваць працу над праектам Канстытуцыйнага акту не было, таму нічога не зьмянілася. Праўда, з розных прычынаў, у тым ліку, і ў зьвязку з працягам сэзона адпачынкаў, беларуская частка працоўнай групы пасьля выступу расейскага прэзыдэнта яшчэ не зьбіралася, але плянуе ў хуткім часе сабрацца й працягваць працу над дакумэнтам.

Акрамя Канстытуцыйнага акту, у парадку дня паседжаньня Савету Міністраў - яшчэ 12 пытаньняў, у тым ліку справаздача аб выкананьні Саюзнага бюджэту за 2001 год, пытаньні стварэньня адзінай сыстэмы тарыфнага й нетарыфнага рэгуляваньня, ход выкананьня сумесных саюзных праграм. Прыканцы мінулага году, нагадаем, узьнікла непаразуменьне вакол зьнікненьня саліднай сумы ў расейскіх рублях з саюзнага рахунку, але беларускаму боку ўдалося неяк "замяць" гэты скандал. Магчыма, пытаньне ўсплыве зноў пры разглядзе справаздачы аб выкананьні Саюзнага бюджэту за мінулы год.

Мяркуецца таксама, што будуць разгледжаныя сумесныя праекты "Стварэньне Адзінай аўтаматызаванай сыстэмы Мытнага камітэту Саюзнай дзяржавы", "Удасканаленьне й разьвіцьцё адзінай тэхналёгіі атрыманьня, збору, аналізу, захаваньня й распаўсюду гідрамэтэаралягічнай інфармацыі й зьвестак аб забруджаньні навакольнага асяродзьдзя" і шэраг іншых.

Апроч новых пытаньняў, у парадак дня трапілі й некалькі пытаньняў, якія не пасьпелі ўзгадніць на мінулым паседжаньні Міністэрствы фінансаў Расеі й Беларусі.

Радыё Рацыя