Подпишитесь на нашу ежедневную рассылку с новыми материалами

Общество


Аляксандар Лукашэнка даў сваё блаславеньне Леаніду Козіку на кіраваньне Фэдэрацыяй прафсаюзаў Беларускай. На панядзелкавай сустрэчы Лукашэнка заявіў, што "ў Козіка дастатковы досьвед для выкананьня адміністрацыйных функцыяй у ФПБ". Сам Леанід Козік, які займае пасаду намесьніка кіраўніка Адміністрацыі, пасьля сустрэчы заявіў: "Прафсаюзы павінны стаць асновай дзяржавы". Былы кіраўнік ФПБ, Уладзімер Ганчарык лічыць, што прафсаюзы пад кіраўніцтвам Леаніда Козіка "ператворацца ў штосьці накшталт БПСМ".

Супрацьстаяньне ФПБ і Адміністрацыі прэзыдэнта скончылася пятнічняй адстаўкай "па ўласным жаданьні" кіраўніка ФПБ Франца Вітко. Тады ж стала зразумела, што "тушыць прафсаюзны пажар" будзе прызначаны Леанід Козік.

Гэтая інфармацыя пацьвердзілася ў панядзелак. У гэты дзень Аляксандар Лукашэнка прыняў намесьніка кіраўніка сваёй адміністрацыі й падтрымаў яго як будучага галаву ФПБ. Кіраўнік дзяржавы, як паведамляе ягоная прэс-служба, адзначыў дастатковы досьвед працы Леаніда Козіка ў адміністрацыйных і прафсаюзных структурах, неабходны для пасьпяховага выканання функцыяў, ускладзеных на прафсаюзы. У 1980-я гады Леанід Козік кіраваў прафсаюзам Барысаўскай швачнай фабрыкі імя Дзяржынскага й заводу БАТЭ.

Аляксандар Лукашэнка падкрэсьліў, што кіраўніцтва краіны зацікаўленае ў тым, каб "прафсаюзы сталі моцнай арганізацыяй - адной з асноваў дзяржавы. Прафсаюзы заўсёды могуць разьлічваць на падтрымку дзяржавы й асабіста прэзыдэнта ў іх канструктыўнай дзейнасці".

Сам Леанід Козік, у сваю чаргу, выказаўся за тое, каб прафсаюзы сталі асновай дзяржавы. Ён лічыць, што ФПБ мае магчымасьць "стаць лідэрам у грамадзянскай супольнасьці Беларусі".

Камэнтуючы сытуацыю, былы кіраўнік ФПБ Уладзімер Ганчарык заявіў Рацыі, што пад кіраўніцтвам Козіка ФПБ "ператворыцца ў штосьці накшталт БПСМ". Ганчарык лічыць, што ўлады дасягнулі сваёй мэты: узялі прафсаюзы пад поўны кантроль дзяржавы. "Раней яны стваралі так званыя "жоўтыя" прафсаюзы. Цяпер яны будуць кіраваць усімі", - сказаў Ганчарык.

Леаніда Козіка ён назваў "чалавекам Лукашэнкі", у якога "ня ўсё атрымалася на мінулай пасадзе, дзе ён ачольваў беларуска-расейскія дачыненьні".

Радыё Рацыя
,