Подпишитесь на нашу ежедневную рассылку с новыми материалами

Общество


У незарэгістраванай Беларускай Партыі Свабоды адбыўся раскол, які лідэр партыі Сяржук Высоцкі назваў "магчымай правакацыяй спэцслужбаў". У нядзелю ў Менску адбыўся сход, на якім частка былых сябраў гэтае незарэгістраванае партыі абвесьціла пра зьмену кіраўніцтва БПС.

Нядзельны сход, які адбыўся ў менскім кінатэатры "Берасьце", праходзіў у атмасфэры надзвычай эмацыйнай - удзельнікі паседжаньня кідалі нажы й заклікалі адзін аднаго "ня здраджваць Бацькаўшчыне й вызвольнаму супраціву". У выніку каля 30 прадстаўнікоў Беларускай Партыі Свабоды на чале зь лідэрам Сяржуком Высокім пакінулі залю. Другая частка (чалавек 50, зь якіх толькі 20 належылі да БПС) засталіся ў залі й абвесьцілі пра зьмену кіраўніцтва БПС.

Сутнасьць канфлікту ў тым, што некалькі былых сябраў БПС абвінавацілі Сержука Высоцкага ў "сярэднявечным нацыяналізьме" й "аўтарытарных мэтадах кіраваньня". Яны склікалі свой сход, на якім пажадалі выправіць сытуацыю. Сярод ініцыятараў яго правядзеньня - Яўген Сідорык, Юрась Карэтнікаў, Аляксей Шыдлоўскі, Славамір Адамовіч, а таксама ня менш эпатажная актывістка руху сэксуальных меншасьцяў Ціна Клыкоўская.

Прыхільнікі Высоцкага (чалавек 30) на ягоны заклік пакінулі гэтае паседжаньне, матывуючы свой сыход тым, што ініцыятары расколу нікога, акрамя сябе, не рэпрэзэнтуюць. У сваю чаргу ініцыятары зьмены кіраўніцтва БПС абвесьцілі, што "Высоцкі застаўся зь меншасьцю", і ня толькі вызвалілі яго з пасады лідэра, але й выключылі з шэрагаў БПС.

На прэсавай канфэрэнцыі, якая адбылася ў панядзелак у менскай штаб-кватэры АГП, намесьнік лідэра Беларускае Партыі Свабоды Генадзь Дранковіч прызнаўся, што нож на сцэне кідаў ён. Гэтым ён хацеў правесьці мяжу паміж сапраўднымі сябрамі Беларускай Партыі Свабоды й тымі, хто да яе не належыць. Сам Сяржук Высоцкі (які, па-ранейшаму, лічыць сябе лідэрам БПС) паведаміў, што нядзельны сход ініцыявалі толькі некаторыя прадстаўнікі БПС, што жывуць на Паўднёвым Захадзе й у Малінаўцы. Разам з тым, гэтая незарэгістраваная партыя, што эксплюатуе правую нацыяналістычную рыторыку, мае філіі ў розных раёнах Менску, а таксама ў Салігорску, Гомлі, Бабруйску, Берасьці й г.д. Усяго ў партыі блізу тысячы чальцоў.

Паводле Сержука Высоцкага, "спробы раскалоць партыю ўзьніклі акурат у той момант, калі ў БПС актыўна пайшла моладзь і партыя здолела перацягнуць у свае шэрагі рух скін-гэдаў, фанаў і г.д.". Лідэр БПС абяцае, што колькасьць сябраў ягонае партыі стане відавочнай увесну ў часе веснавых акцыяў пратэсту. Ён намякае, што менавіта таму зараз партыяй пачалі актыўна цікавяцца спэцслужбы, якія й справакавалі нядзельную сытуацыю.

Разам з тым Сяржук Высоцкі прызнаўся, што каардынацыі паміж незарэгістраванымі й закансьпіраванымі арганізацыямі скрайне правага кшталту ў Беларусі амаль няма. Журналісты жартуюць, што пра скандалы й расколы сябры гэтых партыяў дазнаюцца пераважна зь сюжэтаў Беларускае Тэлевізіі.

Юрась Карманаў

Радыё Рацыя
,