Подпишитесь на нашу ежедневную рассылку с новыми материалами

Общество


Спадар Герд Попэ заявіў, што асуджэньне журналістаў газэты "Пагоня" Мікалая Маркевіча й Паўла Мажэйкі зьяўляецца "непрымальным наступам на свабоду СМІ ў Беларусі. Гэты прысуд знаходзіцца ў абуральнай супярэчнасьці з абавязкамі, якія Беларусь узяла на сябе, як сябра АБСЭ. Ужо той факт, што беларуская крымінальнае права дапусьціла такое асуджэньне, - несумяшчальны з элемэнтарнымі прынцыпамі свабоды слова й СМІ".

На думку прадстаўніка ўраду Нямеччыны, "крытыкаў прэзыдэнта Лукашэнкі хочуць прымусіць замаўчаць". Паводле спадара Попэ, пра гэта ж сведчыць і сытуацыя вакол рэдактара газэты "Рабочы" Віктара Івашкевіча.

У якасьці чарговага прыкладу парушэньня правоў чалавека ў Беларусі прадстаўнік нямецкага ўраду назваў аб'яднаньне некалькіх літаратурных часопісаў на падставе пастановы Міністэрства інфармацыі, у выніку чаго былі замененыя амаль ўсе галоўныя рэдактары. Некаторыя зь іх заявілі, што ня будуць друкаваць пісьменьнікаў, якія крытычна настроеныя ў дачыненьні Лукашэнкі, сярод такіх творцаў - сусьветна вядомы Васіль Быкаў. Са словаў спадара Попэ, "абыходжаньне зь незалежнымі журналістамі й літаратарамі нагадвае той мэтад, якім карысталіся ў дачыненьні няўгодных асобаў у пастсталінскую эпоху ў былым Савецкім Саюзе".

Упаўнаважаны Фэдэральнага ўраду Нямеччыны ў пытаньнях правоў чалавека й гуманітарнай дапамогі Герд Попэ выказаў заклапочанасьць з нагоды імкненьня ўладаў Беларусі мацней кантраляваць і рэгламэнтаваць рэалізацыю асноўных правоў грамадзянаў. У якасьці прыкладу спадар Попэ прывёў нядаўняе заснаваньне камісіі па апытаньнях грамадзкай думкі, а таксама ўхвалены Палатай прадстаўнікоў закон "Аб свабодзе веравызнаньняў і рэлігійных арганізацыях". Як зазначыў спадар Попэ, увядзеньне гэтага закону ў дзеяньне ў вялікай ступені абмяжуе свабоду веравызнаньняў у Беларусі.

"Што да разьвіцьця дэмакратыі й абароны правоў чалавека, то Беларусь, на жаль, далёка адстае ад сваіх суседзяў у Эўропе, - заявіў спадар Попэ. - З-за адсутнасьці прагрэсу ў гэтых сфэрах Беларусь апынаецца на ўзбочыне агульнаэўрапейскіх інтэграцыйных працэсаў. Беларускае кіраўніцтва павінна, нарэшце, замест прадпісанага "абмежаваньня свабоды" (маецца на ўвазе прысуд "пагонеўцам") даць магчымасьць для рэалізацыі асноўных правоў, гарантаваных Канстытуцыяй. Толькі тады стане магчымай нармалізацыя дачыненьняў паміж Нямеччынай і РБ, а таксама аднаўленьне шырокага супрацоўніцтва паміж дзьвюма нашымі дзяржавамі".