Подпишитесь на нашу ежедневную рассылку с новыми материалами

Общество


Кар: - Спадарыня Лінд, якое Вашае меркаваньне пра беларускі рэжым сёньня?

А.Л.: - Рэжым Лукашэнкі - моцна рэпрэсіўны рэжым, які ў эканамічным сэнсе адкідае краіну назад: з прычыны рэпрэсій у сфэры правоў чалавека й палітычных рэпрэсій. Беларусь магла б быць сёньня багатай, дэмакратычнай і моцнай краінай - такой, як Эстонія, Латвія ці Літва. Аднак, на жаль, Беларусь рухаецца ў адваротным накірунку.

Кар: - Якая Вашая думка пра сытуацыю ў сфэры СМІ, маючы на ўвазе суд над журналістамі "Пагоні"?

А.Л.: - На жаль, мы бачым, што беларускія ўлады спрабуюць абвастрыць свае дзеяньні адносна незалежных журналістаў і незалежных СМІ. Як ні як, пэўная журналісцкая свабода магчымая ў Беларусі, нават калі яна й абмяжоўваецца. Улады таксама спрабуюць выгнаць замежныя арганізацыі й NGO зь Беларусі. Як заўсёды, прычынай, напэўна, зьяўляецца тое, што ўлады ўсьведамляюць: насельніцтва можа пачаць урэшце пратэставаць супраць сытуацыі ў краіне. Таму ўлады хочуць, каб распаўсюджвалася як мага менш інфармацыі.

Кар:- Ці зойме Швэцыя якую-небудзь пазыцыю адносна сытуацыі з СМІ ў Беларусі?

А.Л.: - У нас няма па-сапраўднаму якіх-небудзь наўпростых кантактаў з Рэспублікай Беларусь. У нас няма ніякіх палітычных кантактаў зь імі - з прычыны становішча справаў у краіне. Мы пратэстуем, як самі, так і праз Эўрапейскі Зьвяз.

Кар:- У канкрэтным выпадку з газэтай "Пагоня" ці зойме Швэцыя якую-небудзь пазыцыю?

А.Л.: - Так, мы зоймем. І я чакаю, што мы зробім гэта і самі, і праз Эўрапейскі Зьвяз. На жаль, мы паўторым тое, што мы гаварылі шматразова раней беларускім уладам, і зь вельмі маленькім вынікам. Мы спадзяёмся, што Беларусь адкрыецца для свабоды прэсы й павагі правоў чалавека. Пасьля гэтага яны змогуць супрацоўнічаць з краінамі Эўрапейскага Зьвязу. У адваротным выпадку яны будуць заставацца ў ізаляцыі.

Кар: - Спадарыня Лінд, што Вы думаеце пра будучыню Аляксандра Лукашэнкі?

А.Л.: - Са шкадаваньнем павінна адзначыць, што ён, падобна, займае сёньня моцную пазыцыю. Гэта акалічнасьць вельмі ўскладняе сытуацыю ў Беларусі. Але, тым ня менш, я веру, што насельніцтва хутка ўсьвядоміць: Лукашэнка - ня іхная будучыня. Ён толькі ізалюе краіну й не дае ёй ніякай магчымасьці разьвівацца. З гэтае прычыны ён будзе вымушаны сысьці, нават калі ягоная ўлада здаецца даволі моцнай. Няма пэрспэктывы ў тых, хто засноўвае сваю ўладу на гвалце й рэпрэсіях, судох над палітыкамі й журналістамі. Ёсьць толькі адзін магчымы шлях будаваць сваю ўладу - на аснове сапраўднай дэмакратыі.

Радыё Рацыя
,