Подпишитесь на нашу ежедневную рассылку с новыми материалами

Общество


Пра гэта было заяўлена прадстаўніцай літоўскіх кансэрватараў у Сэйме спн. Расай Юкнявічэне ў часе адмысловай прэсавай канфэрэнцыі. Кансэрватары лічаць, што Альгірдас Бразаўскас павінен устрымацца ад кантактаў з афіцыйным Менскам - каб не зашкодзіць уступу Літвы ў NATO. Напярэдадні прэзыдэнцкіх выбараў праблема Беларусі зноў сталася ў Літве прадметам жорсткай унутрыпалітычнай дыскусіі.

Прэзыдыюм апазыцыйнай партыі кансэрватараў Літвы "Саюз Айчыны" заклікаў урад лідэра сацыял-дэмакратаў Альгірдаса Бразаўскаса ўстрымацца ад аднабаковай актывізыцыі стасункаў зь Беларусьсю, бо "гэта можа зашкодзіць інтэграцыі Літвы ў NATO". Літоўскі Сэйм не спыняе спробы наладзіць "канструктыўнае супрацоўніцтва" з Палатай прадстаўнікоў, якую афіцыйная Вільня ня лічыць за легітымны заканадаўчы орган.

"З такой палітыкі нашая краіна можа апынуцца ў адным кантэксьце зь Беларусьсю й Іракам" - папярэджваюць у адмысловай заяве, распаўсюджанай у Сэйме Літвы лідэры кансэрватараў Вітаўтас Ландзбэргіс і Андрус Кубілюс. "Эўропа чакае ад Беларусі мінімальнага знаку добрай волі, але ж літоўскія сацыял-дэмакраты гэтага чакаць не жадаюць" - гаворыцца ў дакумэнце.

Сябра парлямэнцкай фракцыі кансэрватараў Раса Юкнявічэне на адмысловай прэсавай канфэрэнцыі заявіла, што Літве трэба быць "асабліва асьцярожнай у стасунках зь Беларусьсю, бо гэтая краіна падазраецца ў гандлі зброяй з такімі дзяржавамі, як Ірак, які падтрымлівае тэрарызм".

"Мне вядома, і гэта пацьвярджаюць мае крыніцы, што Злучаныя Штаты рыхтуюцца да вельмі сур'ёзнай рэакцыі на беларускі рэжым" - заявіла спадарыня Юкнявічэне. Яна падкрэсьліла: калі Літва сапраўды жадае інтэгравацца ў структуры NATO, то ёй трэба даказаць, што яна ёсьць надзейным партнэрам і вызнае тыя ж прынцыпы, як і дэмакратычныя краіны.

Літоўскія кансэрватары заяўляюць: Літве трэба прытрымлівацца ў стасунках зь Беларусьсю той самай пазыцыі, што й Рада Эўропы, - не пачынаць дыялёгу з Аляксандрам Лукашэнкам да моманту дэмакратызацыі Беларусі не на словах, а на справе. "Такі дыялёг магчымы, але толькі пасьля таго, як Лукашэнка прадэманструе мінімальны знак добрай волі, які сьведчыў бы пра жаданьне палепшыць беларускую сытуацыю" - канстатавала Раса Юкнявічэне, камэнтуючы намеры Бразаўскаса распачаць дыялёг без абавязацельстваў з боку афіцыйнага Менску.

"Беларускае пытаньне" загучала ў Літве з новай сілай напярэдадні прэзыдэнцкіх выбараў. Тэма Беларусі гучыць у Вільні побач з інтэграцыяй у NATO і асаблівым статусам Калінінграду. Назіральнікі мяркуюць, што Альгірдас Бразаўскас, які скіраваў сваю палітыку на здабываньне максымальных выгодаў ад партнэрства з Расеяй, успрымае "беларускую тэму" ў гэтым жа кантэксьце.

Ёнас Лаўрынавічус