Подпишитесь на нашу ежедневную рассылку с новыми материалами

Общество


Беларускія ўлады надаюць вялікае значэньне разьвіцьцю стасункаў з Ісламскай Рэспублікай Іран. Супрацоўніцтва з гэтай краінай разглядаецца ў якасьці аднаго з прыярытэтных накірункаў замежнай палітыкі Беларусі ў краінах Азіі й Афрыкі. Пра гэта заявіў міністар замежных справаў Беларусі Міхаіл Хвастоў у выступе на нядаўнім прыняцьці ў іранскай амбасадзе ў Менску. Спадар Хвастоў адзначыў, што за апошнія гады паміж Беларусьсю ды Іранам склаліся сяброўскія й плённыя стасункі ва ўсіх сфэрах. Не хавае гэтага й амбасадар Ірану ў Беларусі Махамад Хашэмі Гальпаегані.

М.Г.: - Паміж Іранам і Беларусьсю склаліся вельмі добрыя палітычныя стасункі й вельмі добрыя дачыненьні на міжнароднай арэне. Нядаўні візыт Аляксандра Лукашэнкі засьведчыў вельмі высокі ўзровень дыпляматычных адносінаў дзьвюх краін. У працэсе дыялёгу мы можам разьвіваць свае стасункі. Мы шмат на што маем блізкі пункт гледжаньня. У нас вялікі патэнцыял для супрацоўніцтва, асабліва ў галіне эканомікі. У Беларусі разьвітая оптыка, электроніка, машынабудаваньне, а ў нас ёсьць прадукты харчаваньня, мыйныя сродкі, інжынэрныя паслугі. Мы маем патэнцыял у эканоміцы, палытыцы ды культуры й можам яго выкарыстоўваць.

Сёлета плянуецца актывізаваць беларуска-іранскі дыялёг на найвышэйшым роўні. На прыканцы лютага - пачатку сакавіка адбудзецца візыт міністра замежных справаў Міхаіла Хвастова ў Тэгеран. Прэзыдэнт Лукашэнка накіраваў запрашэньне іранскаму прэзыдэнту Махамаду Хатамі наведаць Беларусь. Тэрміны й пытаньні арганізацыі гэтага візыту будуць абмяркоўвацца ў часе знаходжаньня ў Іране міністра Хвастова. Ня выключана, што ў часе двухбаковых сустрэчаў будзе абмяркоўвацца пытаньне ваеннага супрацоўнітва паміж Беларусьсю ды Іранам. Як адзначыў іранскі амбасадар, у часе ягонага шасьцімесячнага знаходжаньня ў Беларусі пытаньні вайсковага супрацоўніцтва й гандлю зброяй не ўздымаліся. Аднак ён сказаў журналістам…

М.Г.: - Мы, натуральна, зьбіраемся ўмацаваць нашае вайска, каб захаваць наш народ і тэрытарыяльную цэласнасьць.

Нагадаю, прэзыдэнт ЗША Джордж Буш заявіў, што Іран - разам з Іракам і Паўночнай Карэяй - утварае, як ён назваў, "вось зла". Кіраўнік ЦРУ Джордж Тэнэт адзначыў, што Іран уяўляе сур'ёзную пагрозу глябальнай бясьпецы, бо, прыкладам, іранскі урад мае праграму разьвіцьця ракетных тэхналёгіяў і спрабуе атрымаць доступ да зброі масавага зьнішчэньня.

Аляксандар Дашчынскі

Радыё Рацыя