Подпишитесь на нашу ежедневную рассылку с новыми материалами

Общество


Прафсаюзы тыднёвік "Беларускі час" адгукнуўся на выказваньне кіраўніка дзяржавы сваімі развагамі пра ролю й месца прафсаюзаў у грамадзтве.

А.Лукашэнку не падабаецца, паводле ягоных словаў, "палітычная тузаніна" прафсаюзаў, але ж ён ня мае жаданьня зьнішчаць прафсаюзны рух, - пра гэта кіраўнік дзяржавы заявіў 12 лютага. "Беларускі час" зьмяшчае камэнтар намесьніка кіраўніка інфармацыйна-аналітычнага цэнтру ФПБ Станіслава Каласоўскага. На ягоную думку, улады спрабуюць пераканаць шараговых сябраў прафзьвязаў у тым, што прафсаюзная вярхушка ўся прагніла й займаецца палітыканствам, а не абаронаю інтарэсаў працоўных. Маўляў, калі ня будзе прафбосаў, то й жыцьцё спакайнейшым стане, а ўлада дапаможа ў вырашэньні сацыяльных праблемаў.

Аднак нават буйныя прафарганізацыі без каардынацыі зьверху ня змогуць сур'ёзна ўплываць на палітыку ўраду. Сапраўды, ці запросяць кіраўнікоў прафкамаў на падпісаньне Генэральнага пагадненьня між урадам, працадаўцамі й прафзьвязамі?

Яшчэ на адну фразу тыдня адгукаецца "Беларускі час". Як вядома, старшыня Вярхоўнага суду Беларусі Валянцін Сукала заявіў, што краіна не гатовая да ўвядзеньня інстытуту прысяжных засядальнікаў. Свае думкі наконт гэтага выкладаюць на старонках газэты доктар юрыдычных навук Міхаіл Пастухоў, старшыня Згуртаваньня беларусаў сьвету "Бацькаўшчына" Алена Макоўская, кампазытар Эдуард Ханок і адвакат Гары Паганяйла.

Пад рубрыкай "Актуальнае пытаньне" "Беларускі час" падае артыкулы сваіх карэспандэнтаў, прысьвечаныя тэме будаўніцтва жытла. Дзіўна, улады кажуць пра посьпехі ў гэтай галіне, аднак штогод колькасьць збудаваных кватэр зьмяншаецца, гэтак як і колькасьць людзей, якія могуць сабе дазволіць такую "раскошу" як набыцьцё ўласнага жытла.

12-я й 13-я старонкі выданьня прысьвечаныя эўра: чаму на Захадзе падаражэла піца й паслугі прастытутак, чаму эўраманэта часьцей падае "арлом" дагары, колькі людзей маюць алергію на эўраманэты й чаму эўра рэдка падрабляюць?

Традыцыйна "Беларускі час" зьмяшчае на сваіх старонках парады юрыста, гараскоп на наступны тыдзень і крыжаванку.

Алесь Хмяльніцкі

Радыё Рацыя