Подпишитесь на нашу ежедневную рассылку с новыми материалами

Общество


На паседжаньні Каардынацыйнага савету генэральных пракурораў краін Садружнасьці не зацьвердзілі канчаткова ніводнага дакумэнта.

Цягам двух дзён у Менску гасьцявалі 11 прадстаўнікоў пракуратураў краін СНД. Меркавалася, што яны прымуць шэраг рашэньняў па ўдасканаленьні сумеснай дзейнасьці ў барацьбе са злачыннасьцю. Сярод іншага, плянавалася зацьвердзіць палажэньне аб каардынацыі высілкаў у супрацьдзеяньню асабліва небясьпечным злачынствам: тэрарызму, незаконнаму гандлю зброяй, наркотыкамі, бандытызму. Яшчэ пракуроры мелі намер прыняць рашэньне аб стварэньні Навукова-мэтадычнага цэнтру, які займаўся б дасьледаваньнем актуальных прававых праблемаў, распрацоўкай прапановаў па ўніфікацыі нацыянальных заканадаўстваў у сфэры барацьбы са злачыннасьцю. Аднак ніводзін з заплянаваных раней дакумэнтаў ня быў прыняты. Кіраўнікі пракуратураў так і не змаглі знайсьці паразуменьня.

Ня выклікала асаблівых пярэчаньняў ва ўдзельнікаў пракурорскага саміту толькі пытаньне аб стварэньні сакратарыяту Каардынацыйнага савету. Пракуроры пагадзіліся, што ім не пашкодзіць мець яшчэ адну бюракратычную структуру, у штаце якой будзе 6 чалавек. Адметна, што сакратарыят будзе разьмешчаны ў Менску. Хоць пачаткова плянавалася пасяліць гэтых чыноўнікаў у Маскве. Але Расея, відавочна, не захацела садзіць сабе на шыю нават невялікі пракурорскі бюракратычны апарат. Бо на паседжаньні станоўча вырашылі толькі пытаньне пра часовае фінансаваньне новай структуры, а ў далейшым усе выдаткі, пэўна, давядзецца несьці беларускаму боку.

Увогуле, стаўленьне расейскага боку да менскага саміту пракурораў было абыякавым. Генэральны пракурор Расеі Ўладзімір Усьцінаў, нягледзячы на тое, што быў абраны яшчэ на адзін год старшынём Каардынацыйнага савету генэральных пракурора СНД, чамусьці не захацеў пагасьцяваць у Менску. Адразу ж, як толькі скончылася паседжаньне, спадар Усьцінаў накіраваўся ў аэрапорт і першым са сваіх калегаў па СНД пакінуў беларускую сталіцу.

Ян Мікалаеў

Радыё Рацыя
,