Подпишитесь на нашу ежедневную рассылку с новыми материалами

Общество


22 лістапада Аляксандар Лукашэнка прыняў з дакладам Генэральнага пракурора Віктара Шэймана. Сярод іншага генпракурор паінфармаваў Лукашэнку пра накіраваньне ў суд гэтак званае "футбольнае" крымінальнае справы.

Пасьля прызначэньня на пасаду генпракурора Віктар Шэйман штотыднёва сустракаўся з Лукашэнкам і паведамляў пра вынікі працы пракуратуры. Аднак апошнім часам Шэйман знаходзіўся з афіцыйным візытам у Кітаі. Таму давялося рабіць справаздачу спадару Лукашэнку адразу за 2 тыдні.

Заадно Шэйман даклаў прэзыдэнту краіны й аб выніках праверкі Дзяржаўнага мытнага камітэту й аб'яднаньня "Белптушкапрам". Усяго ж за апошнія 2 тыдні, паводле інфармацыі Шэймана, пракуроры адкрылі 210 крымінальных справаў і арыштавалі 720 чалавек.

Спадар Шэйман пахваліўся Лукашэнку, што ягонае ведамства накіравала ў суд гэтак званую "футбольную" крымінальную справу. Маецца на ўвазе справа прэзыдэнта віцебскага футбольнага клюбу "Лякаматыў", дырэктара фірмы "Інспо" й футбольнага арбітра.

Усе ўтрох зьвінавачваюцца за крадзёж амаль 26 тысяч даляраў, атрыманых за продаж віцебскага футбаліста саратаўскаму клюбу "Сокал". Гэта першы выпадак крымінальнага перасьледу футбольных функцыянэраў у нашай краіне.

Ян Мікалаеў

Радыё Рацыя
,