Мiкалай Шчацько,

Калядны акустычны канцэрт N.R.M. з нагоды 15-годдзя гурта адбыўся ўчора, 17 снежня, у канцертнай залi "Мiнск" пры поўным аншлагу.

На канцэрт культавага беларускага гурта N.R.M дзесьцi за два тыднi квiткоў дастаць было амаль немагчыма. Паслухаць і паглядзець монстраў айчыннага року не ў цесным клюбе (як, напрыклад, год таму), а на адной з галоўных канцэртных пляцовак краiны, не зважаючы на моцны мароз, прыйшлi як старыя, так i маладыя.

За няпоўных тры гадзiны выступу музыкi адыгралi каля 25 песень i раздалi гледачам колькi калядных падарункаў ад сябе ды спонсараў.

Фота: generation.by



Падчас выступу Лявон Вольскi, Пiт Паўлаў, Юрась Ляўкоў ды Алезic Дземiдовiч не забылiся на старыя хiты (як жартаваў Лявон, "наступная песня шмат для каго, напэўна, будзе новай") – "Краiна", "ЛаЛаЛа", "Одзiрыдзiдзiна", а таксама выканалi адносна новыя песнi: "Мiнск-Менск", "Падводная лодка", "Тое, што ёсць памiж намi". Прыемным сюрпрызам стала перапрацаваная Jingle Bells:

Жыць табе
Жыць табе
Будзе весялей
Мы заўтра паляцiм з табой
Пад музыку завей



"Мiнiстры" (N.R.M. – Незалежная Рэспублiка Мроя, выканаўцы – яе "мiнicтры") не забылicя i пра супольныя праэкты: узгадалi "Святы вечар" песняй "2000 год", "Я нарадзiўся тут" ("Сонца нам дапаможа", "Я нарадзiўся тут"), "Народны альбом" ("Простыя словы", "Я, дажалю, ня пан")…



Гралася амаль усё на "акустыках", толькi для двух твораў Пiт выкарыстаў "электру", а Лявон перасеў за стылёвае чорнае фартэпіяна.





Пасля выканання "Мiнск-Менск" Лявон узгадаў нядаўняе інтэрв'ю на TUT.BY. "Пыталicя - дзе ж вы бачылi ў Мiнску “гатычныя вежы касцёлаў старых”? Канешне, у Мiнску няма. А ў Менску – ёсць!".

"Легкiя-Легкiя" Лявон у прамым "мабiльным этэры" перадаў беларусам Калiфорнii, за што атрымаў з-за акiяну калядныя вiншаваннi i шчырае дзякуй.





У параўнаннi з вялiкiм "электрычным" канцэртам на дзесяцiгоддзе ў той жа КЗ "Мiнск" больш за пяць год таму (2004), гэты акустычны канцэрт быў больш сцiплы, цеплы ды меньш напружаны. Зала не зрывалася на "Жыве Беларусь!" пасля кожнай песнi, са сцягаў былi бачныя толькi N.R.M.-аўскiя… Тым не менш, гурт зноў здолеў пераўтварыць КЗ у танцпляцоўку: дзесьцi чвэрць выступу, пачынаючы з "Маё пакаленне" i да "Бывай" на бiс, амаль усе прысутныя танчылi, на месцы нiхто не сядзеў.







Музыкi шмат выбачалicя з-за "арэндных дамоваў", якiя не дазволiлi выйсцi на бic яшчэ раз, шчыра падзякавалi ўсiм прысутным i пасля "Бывай" развіталіся. Публiка зразумела, i нават не пагукаўшы N.R.M. яшчэ раз, пацягнулася у гардэроб.

Наступны, ужо паўнавартасны электрычны канцэрт, абяцаюць яшчэ да канца зiмы – у "Рэактары", 10 лютага.



P.S. Квіткі на канцэрт N.R.M. 10 лютага 2010 г. ў "Рэактары" ужо ў продажы. Усе квiткi – на танцпол. Яны будуць даражэць па меры наблiжэння даты канцэрту. Да 31 снежня кошт будзе складаць 30 000 руб., з 1 да 15 студзеня – 35 000, з 16 да 31 студзеня – 40 000, з 1 да 9 лютага – 45 000 руб. У дзень канцэрту квiткi будуць каштаваць 50 000 руб.

За дадатковай інфармацыяй і для замовы квіткоў звяртайцеся па тэлефонах: velcom 655-55-96, МТС 655-55-96, гарадскі 280-15-10, а таксама на сайт soundline.by.
-10%
-30%
-20%
-15%
-50%
-10%
-11%
-10%
-20%