 |
Наталля Шыянок згодная з тэзай кампаніі "Будзьма беларусамі!" "Культура паляпшае жыццё". |
Ажывіць свята
Нагадаем, святочныя мерапрыемствы, прысвечаныя 1040-й гадавіне заснавання Віцебска і 70-годдзю з дня вызвалення горада ад фашысцкіх захопнікаў, расцягнуцца на тры дні і пройдуць 27-29 чэрвеня.Прысутнасць афіцыйных асобаў ніякім чынам не паўплывала на жывасць і нефармальнасць "Кірмашу праектаў". Атмасферу падсалоджвалі кава з цукеркамі ды ўсмешкі. Вольных месцаў у выставачнай зале Музычнай гасцёўні не было.
Рэгіянальны каардынатар кампаніі "Будзьма беларусамі!" Уладзімір Булаўскі, які традыцыйна выконваў ролю вядоўцы, папярэдзіў перад пачаткам, што ўсе "ідэі будуць вельмі актыўнымі і інтэрактыўнымі". І падзякаваў прадстаўнікам гарвыканкама за адкрытасць.
У сваю чаргу, начальнік аддзела ідэалагічнай працы, культуры і па справах моладзі Віцебскага гарвыканкама Наталля Шыянок паабяцала, што "частка прапаноў будзе абавязкова выкарыстана ў межах плана святочных мерапрыемстваў да Дня горада" і выказала надзею, што "гэтыя прапановы ўдасканаляць змест нашага свята".
Танцы - у масы, фоткі - на вяроўкі
На "кірмашы" 10 чэрвеня прэзентавалі 7 праектаў. Некалькі з іх - харэаграфічныя: "Традыцыйныя танцы для ўсіх" (аўтары Ганна Архіпенка і Святлана Вакула) і "Танцавальны оўпэнэйр. Гістарычныя танцы ў масы!" (сёстры Кацярына і Наталля Курыленкі). Абедзьве ідэі вельмі блізкія па духу. Іх аўтаркі прагнуць навучыць віцяблян танчыць так, як гэта рабілі продкі. Пад жывую музыку, на адкрытых пляцоўках. Іншая справа, што ў горадзе бракуе аўтэнтычных музыкаў…Вядомы віцебскі фатограф Дзмітрый Лось прадставіў праект "Фотасушкі", якую прапанаваў правесці ў скверы Маякоўскага за ратушай. Выдаткі мінімальныя: вяроўкі, прышчэпкі для бялізны ды раздрукаваныя фотаздымкі. Ідэя знаёмая віцяблянам і ўпадабаная імі. У горадзе такія "фотасушкі" праходзілі неаднойчы.
У адрозненні ад нядаўняга праекта "Святло", "Фотасушка" на Дзень горада, па задумцы аўтара, мае быць цалкам дэмакратычнай: "Сваю картачку зможа прычапіць на вяроўку кожны, не абавязкова быць прафесійным фатографам. Хоць даставай з кішэні фотаздымак з пашпарта - ды чапляй".
Футбольны фрыстайл
На думку аўтара гэтых радкоў, самая яркая і арыгінальная прапанова - правесці ў Дзень Віцебска турнір па футбольным фрыстайле. Альтэрнатыўны, незнаёмы большасці, але вельмі прыгожы від спорта. Як фрыстайлеры жанглююць футбольнымі мячамі - гэта фантастыка!Ранальда адпачывае. Ідэя гэтая тым больш актуальная, што можа ажыццявіцца ў час бразільскага мундыяля.Як кажа аўтар праекта, вядомы ў Беларусі і адзіны ў Віцебску футбольны фрыстайлер Андрэй Хіхіч, для арганізацыі такога турніру патрабуецца зусім няшмат - запрасіць суддзяў з Расіі ды падрыхтаваць просценькія прызы для пераможцаў. Каля 20 фрыстайлераў ужо гатовы купіць квіткі да Віцебска. Турнір па футбольным фрыстайле можна правесці на пляцоўцы каля Летняга амфітэатра ці ў зоне адпачынку ў пойме Віцьбы.
"Смерць шпалерам!"
Наступны праект заклікаў: "Смерць шпалерам!". Учыніць расправу над шпалерамі прапаноўваў яшчэ ў мінулым стагоддзі Казімір Малевіч. Аднайменны эскіз роспісу будынку быў зроблены ім у Віцебску ў 1919 годзе. Сам Малевіч гэтую ідэю не ажыццявіў. Але ў 1992 годзе яе падхапілі члены творчай суполкі "Квадрат". І ў Віцебску на тарцы будынку па вуліцы Леніна, 18 з'явілася гэтак званая "сцяна Малевіча". |
Прэзентацыя праекта "Смерць шпалерам!" |
Роспіс у стылі эскіза Малевіча "Смерць шпалерам!" неаднойчы "паміраў" і адраджаўся. Яго саскрэбвалі і зафарбоўвлі доблесныя супрацоўнікі ЖКГ, але праз некаторы час малюнак зноў "уваскрасаў". Апошні раз - у 2010 годзе. Але цяпер "сцяна Малевіча" зноў белая.
Ініцыятарам ўзнаўлення эскіза выступіў віцебскі Цэнтр сучаснага мастацтва. "Мы ўжо адаптавалі эскіз да тарца будынку. Магчымасць роспісу ўзгоднена з аддзелам архітэктуры гарвыканкама. Разлічаны бюджэт - грошы, патрэбныя на фарбы і паслугі аўтавышкі. Гэта 4 млн рублёў. Праект будзе выконвацца ў форме эпахальнага перформансу", - распавяла супрацоўніца Цэнтра сучаснага мастацтва Алена Ге.
Яшчэ некалькі прэзентаваных праектаў мелі на мэце насыціць Свята горада вершамі ды кнігамі. Гэта "Музычна-літаратурная пляцоўка" Алеся Замкоўскага і "Вулічны букросінг" Яўгена Камінскага.
Катацца, дык з музыкай
Нямала ідэяў засталося па-за межамі прэзентацыі, але яны таксама былі агучаны. Гэтак, маладыя віцябляне прапаноўвалі "пасадзіць духавы аркестр на трамвай №1 і катаць па горадзе", а таксама наогул адмяніць на свята плату за праезд і зладзіць тэматычныя экскурсіі на грамадскім транспарце. Яшчэ прапаноўвалі сустракаць цягнікі ў Дзень горада з духавым аркестрам. А ідэю забараніць продаж алкаголю падчас Дня горада ўдзельнікі "Кірмашу праектаў" сустрэлі дружнымі апладысментамі.Акрамя таго, моладзь выявіла жаданне "прыбраць металічную агароджу ў цэнтры горада і перакрыць тут рух транспарту", зладзіць флэшмоб "Сэрца Віцебска", дзень сям'і, конкурс пясчанай архітэктуры і дрыфт-шоу - на аўтадроме побач з ДАІ. Самай салодкай была ідэя арганізаваць конкурс пірагоў і тартоў "Віншуем родны горад". Конкурсную выпечку потым можна было б аддаць дзеткам і звычайным мінакам.
Гарвыканкам: усе праекты можна ажыццявіць
Падводзячы вынікі "Кірмашу праектаў", Наталля Шыянок дзівілася: "Тут практычна ніхто не папрасіў грошай! А калі і просяць, дык адразу знаходзяцца партнёры, якія нешта падказваюць ці абяцаюць. А мы ж дзеці іншага часу: быў дзяржаўны бюджэт, і ўсё было зразумела. Але сённяшні час дыктуе новыя патрабаванні. І патрабуе ад моладзі фантазіі, як гэтыя грошы зарабіць…".Спадарыня Шыянок падкрэсліла, што ўсе прадстаўленыя праекты "можна ажыццявіць". Некаторыя - ужо на Дзень горада. Гэтак, літаратурныя праекты для апрабацыі можна прывязаць да "Літаратурнай пляцоўкі", якая ўжо прадугледжана праграмай святкавання: "Моладзь можа браць удзел і чытаць вершы побач з масцітымі пісьменнікамі, удзельнікамі і членамі пісьменніцкіх арганізацый. Ніякіх праблем няма…" Танцавальныя праекты могуць ажыццявіцца, як лічыць Наталля Шыянок, на "Тэатральнай пляцоўцы".
"Дабро" на здзяйсненне атрымала таксама "Фотасушка". "Мне здаецца, дрэваў для вяровак у скверы Маякоўскага хапае", - заўважыла прадстаўніца гарвыканкама. Яна таксама паабяцала абмеркаваць у аддзелах адукацыі і спорту праект турніру па футбольным фрыстайле, які падаўся ёй "выдатным і яркім".
Наконт "сцяны Малевіча" заўважыла: "Сцяну мы павінны зрабіць калі не да свята горада, дык да "Славянскага базару". Галоўнае - зрабіць. Тым больш, што мы рабілі ўжо гэта двойчы".
"Давайце, сябры, аб'яднаем высілкі і будзем адкрытыя адзін да аднога. І не трэба баяцца, што недзе ў выканкаме ці ва ўстанове культуры альбо адукацыі сядзяць закамплексаваныя людзі… Вялікі дзякуй, што вы захавалі жаданне жыць творча, крэатыўны і ў плыні часу. Што спрабуеце вырашаць праблемы самі, не разлічваючы на добрага дзядзю. Але мы ўсё-такі пастараемся не застацца ў баку. Частку праектаў ажыццявім бліжэйшым часам, частку - пазней. Жыццё - доўгае…" - запэўніла Наталля Шыянок.
На гэтай ноце прэзентацыйная частка "Кірмашу праектаў" павольна перацякла ў фармат нязмушаных размоў пад каву з цукеркамі.
