Праз пажар з Віцебскай лякарні эвакуявалі 30 чалавек

Узгаранне адбылося на другім паверсе аддзялення неўралогіі Віцебскай клінічнай лякарні. У гэты час там не было хворых, бо вядзецца рамонт. Здарэнне адбылося 4 лістапада ўвечары.

Прычынай пажару называецца неасцярожнае карыстанне агнём пры курэнні. Выратавальнікі кажуць, што другі і трэці паверхі будынку былі задымленыя. Вінаватага ў пажары пакуль не знайшлі. З трэцяга паверха па калідоры ў іншы блок выратавальнікі эвакуявалі 30 чалавек, у тым ліку цяжка хворых. Пра гэта Еўрарадыё распавёў прэс-сакратар МНС Віталь Навіцкі.

Навіцкі: “Медперсаналам сумесна з супрацоўнікамі МНС было эвакуявана 30 хворых. З іх чацвёра цяжкіх і шасцёра сярэдняй цяжкасці. Пажар ліквідаваны за 16 хвілінаў. Ніхто не пацярпеў”.

Па словах Навіцкага, былі пашкоджаныя толькі шыбы, якія ляжалі на другім паверсе, дзе вядзецца рамонт.