Алег Слiжэўскi. Фота rec.gov.by

Начальнiк упраўлення грамадскiх аб"яднанняў Мiнiстэрства юстыцыi Алег Слiжэўскi прызнаўся Еўрарадыё, што наяўнасць забароны не перашкаджала яму па працы выязджаць у краiны Еўропы. Таму зараз, калi гэтую забарону афiцыйна знялi, ён не адчувае патрэбы кудысьцi паспешлiва з"ездзiць.

Алег Слiжэўскi: "Пакуль гэтыя спiсы былi, я не адчуваў нейкiх нязручнасцяў. Быў я i ў той перыяд i ў Еўропе, у тым лiку i па службовых пытаннях. Але зараз, пасля адмены забароны, не быў нi разу. I пакуль не планую. Магчыма, у далейшым, але пакуль такiх планаў няма".

Паездзiў па свеце, нягледзячы на забарону, i былы сенатар Савета Рэспублiкi Мiкалай Чаргiнец. Ён нават заблытаўся ў падлiках, колькi разоў быў у Парыжы за апошнi час - цi то 10, цi то 15. Таму

Мiкалай Чаргiнец. Фота racyja.by

таксама нiкуды ехаць адпачываць не спяшаецца.

Мiкалай Чаргiнец: "Калi мне трэба, я еду ў Еўропу. Прымаюць спiсы, а калi без нас абыйсцiся не могуць, мы ўсё адно працуем з iмi! Божухна! Я ва ўсiх краiнах быў. Летась у Парыжы быў ужо цi то 10, цi то 15 разоў. Во як! Таму ехаць туды ў адпачынак - мне гэта не цiкава".

Яшчэ да адмены "еўрапейскiх спiсаў" былы дэпутат Палаты прадстаўнiкоў Сяргей Касцян прызнаваўся Еўрарадыё, што марыць наведаць Прагу i Сербiю. Але пакуль ён не скарыстаўся магчымасцю наведаць мясцiны сваёй мары: чакае, пакуль туды можна будзе патрапiць у складзе афiцыйнай дэлегацыi. Кажа, ён зараз чалавек беспрацоўны, толькi пачаў афармляць пенсiю, i таму грошай не багата.

Cяргей Касцян. Фота soyuz.by

Сяргей Касцян: "Будзе паседжанне мiжнароднага славянскага камiтэта ў Празе ў лютым наступнага года, дзе вельмi чакаюць, каб я прысутнiчаў. I я вельмi спадзяюся, што буду там прысутнiчаць. Ну, i мяне запрашаюць сербы, радыкальная партыя. Яны ўдзельнiчаюць у працы славянскага парламенцкага саюза, старшынёй якога я з"яўляюся, i яны запрашаюць мяне наведаць Сербiю як старшыню гэтага саюзу".

Не "рвануў", паводле яго слоў, за мяжу пасля адмены "спiсаў неўяздных" i сакратар Цэнтрвыбаркама Мiкалай Лазавiк.

Мікалай Лазавік. Фота gdb.rferl.org

Мiкалай Лазавiк: "Зараз, калi знялi гэтыя абмежаваннi, не рвануўся кудысьцi за мяжу. Не было i да ўвядзення забароны на выезд у Еўропу ў мяне такiх паездак, да i жадання не было, i цяпер яно, гэтае жаданне, не з"явiлася. Зараз не было неабходнасцi, i таму нiякiх паездак не было. Больш за тое, блiжэйшыя паездкi, што плануюцца, не на захад, а на паўднёвы ўсход. У снежнi будуць выбары ў Туркменii. I калi складуцца нармальна ўсе абставiны i прадставiцца магчымасць, я хацеў бы ўзяць удзел у назiраннi за выбарамi ў Туркменii".

Сакратар ЦВК прызнаўся Еўрарадыё, што калi б у яго i ў старшынi Цэнтрвыбаркама Лiдзii Ярмошынай было такое жаданне, то i яны б, як Чаргiнец i Слiжэўскi, паездзiлi па Еўропе, нягледзячы на ўсе забароны.

Мiкалай Лазавiк: "Дзяржава, на тэрыторыi якой праходзiць мiжнароднае мерапрыемства, абавязаная выдаць вiзу тым асобам, якiх мiжнародная арганiзацыя запрашае да ўдзелу ў дадзеным мерапрыемстве. I, напэўна, калi б Лазавiк альбо Ярмошына вельмi хацелi патрапiць на нейкае мерапрыемства, дзе прадугледжваўся наш удзел i персанальна нас туды запрашалi, мы б маглi туды патрапiць. Але калi мы непажаданыя там госцi, то навошта туды рвацца? Такая была нашая пазiцыя".

У спiсе неўяздных беларускiх чыноўнiкаў засталiся лiчаныя асобы — на чале з мiнiстрам МУС Уладзiмiрам Навумавым, Дзмiтрыем Паўлiчэнкам i Юрыям Падабедам. Але атрымлiваецца, што iм, каб абыйсцi гэтую забарону, сёння не хапае толькi запрашэння нейкай мiжнароднай арганiзацыi. Напрыклад, мiжнароднага саюзу байцоў АМАПу.